काठमाडौँ । विश्वभर महामारीको रुपमा फैलिएको कोरोना भाइरस ९कोभिड–१९०को प्रकोप दिन प्रतिदिन भयावह बन्दै गइरहेको छ। चीनको वुहानबाट सुरु भएको कारोना भाइरसको संक्रमणबाट हालसम्म संसारभर १ लाख १५ हजार २ सय ६९ जनाको मृत्यु भएको छ भने साढे १८ लाखभन्दा बढी संक्रमित बनेका छन्। पछिल्लो समय दक्षिण एशियाली राष्ट्रहरु समेत कोरोना भाइरसको चपेटामा पर्दै गएका छन्। दक्षिण एशियाका आठ देशमा हालसम्म कोरोना भाइरसको संक्रमणबाट ४ सय ९१ जनाको मृत्यु भएको छ भने १६ हजार ३ सय ३५ जनामा संक्रमण पुष्टि भएको छ। दक्षिण एशियाली राष्ट्रहरुमध्ये भारत कोरोना भाइरसको प्रकोपबाट सबैभन्दा बढी प्रभावित भएको छ। हालसम्म भारतमा कोरोना भाइरसको संक्रमणबाट ३ सय ३१ जनाको मृत्यु भएको छ भने ९ हजार २ सय ४० जनामा संक्रमण देखिएको छ। भारतपछि पाकिस्तानमा कोरोनाको संक्रमण दर तीब्र देखिएको छ। हालसम्म पाकिस्तानमा ५ हजार ३ सय ७४ जनामा कोरोना भाइरसको संक्रमण देखिएको छ भने ९३ जनाले ज्यान गुमाएका छन्। दक्षिण एशियाका ८ देशमा कोरोनाबाट सबैभन्दा बढी प्रभावित देशहरुमध्ये तेस्रो स्थानमा बंगलादेश रहेको छ। हालसम्म बंगलादेशमा कोरोनाबाट ३९ जनाले ज्यान गुमाएका छन् भने ८ सय ३ जनामा संक्रमण पुष्टि भएको छ। यस्तै अफगानिस्तानमा पनि कोरोनाको प्रभाव बढ्दै गएको छ। हालसम्म २१ जनाले कोरोनाको संक्रमणबाट ज्यान गुमाएको अफगानिस्तानमा ६ सय ६५ जना कोरोनाबाट संक्रमित बनेका छन्। श्रीलंकामा अहिलेसम्म २ सय १४ जनामा कोरोना भाइरसको संक्रमण पुष्टि भएको छ भने ७ जनाले ज्यान गुमाएका छन्। अन्य तीन देश माल्दिभ्स, नेपाल र भुटानमा भने हालसम्म कोरोना भाइरसको संक्रमणबाट कसैको पनि मृत्यु भएको छैन। तर संक्रमण भने देखिएको छ। माल्दिभ्समा हालसम्म २० जनामा कोरोना भाइरसको संक्रमण देखिएको छ। यस्तै नेपालमा १४ जना र भुटानमा ५ जनामा कोरोना भाइरसको संक्रमण देखिएको छ। नेपालमा आइतबार र सोमबार मात्रै पाँच जना नयाँ संक्रमित भेटिएका छन्। आइतबार वीरगञ्जमा तीन जना भारतीयमा कोरोना भाइरसको संक्रमण पुष्टि भएको थियो। सोमबार दुई जना थपिएका छन्। कैलालीमा एक महिला र रौतहटमा एक १९ वर्षीय युवामा कोरोना भाइरसको संक्रमण पुष्टि भएको छ।  यो सामग्री वर्ल्डोमिटरको तथ्यांकको आधारमा तयार पारिएको हो।  देश सञ्चारबाट