काठमाडौं । पछिल्लो २४ घण्टामा देशका विभिन्न स्थानमा आएको पहिरोमा परी ८ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले दिएको जानकारी अनुसार हिजो सोमबार बिहान १० बजेदेखि मंगलबार बिहान १० बजेसम्मको अवधिमा उनीहरुको मृत्यु भएको हो। यस्तै घटनामा २ जना बेपत्ता भएका छन् भने ६ जना घाइते भएका छन्। प्राधिकरणका अनुसार देशका विभिन्न १४ स्थानमा पहिरो गएको छ भने ७ स्थानमा अविरल वर्षा भएको छ। पहिरोका कारण ३ स्थानमा बाटो अवरुद्ध भएको प्राधिकरणले जनाएको छ।
