धुनिवेशी । नेपालमा दिनदिनै कोरोना संक्रमण दर बढिरहेको अबस्थामा बिभिन्न जिल्ला तथा क्षेत्रहरुमा निषेधाज्ञा जारी भईरहेका छन् । धादिङ जिल्लामा पनि कोरोना संक्रमणदर उच्च भएको अबस्थामा पालिकाहरुले निषेधाज्ञा जारी गरेका छन् । धुनिबेशी नगरपालिकाले पनि आज राती १२ बजेबाट लागू हुने गरि अत्याबश्यक बाहेक सबै सेवा बन्द गर्ने निर्णय गरेको छ । नगरपालिकाले अत्याबश्यक बाहेक अन्य सेवालाई पूर्ण रुपमा बन्द गर्ने निर्णय गरेको हो । आज एक सुचना जारी गर्दै नगरले होटल, रेष्टुरेन्ट, लज लगायतका अन्य सबै सेवाहरु बन्द गर्ने निर्णय गरेको छ । नगरपालिकाको क्षेत्रभित्र रहेका पृथ्वीराजमार्ग र त्रिभुवन राजपथका दायाँ र बायाँ सञ्चालनमा रहेका होटल, रेष्टुरेन्ट,खाजाघर, लज लगायतका सेवा बन्द गर्ने निर्णय भएको सुचनामा जनाईएको छ ।
यसैगरी कुनै पनि सभा, सम्मेलन, पार्टी लगायतका कार्यक्रम नगर्न अनुरोध समेत गरिएको छ भने बाहिर ननिस्कन पनि आग्रह गरिएको छ । यदि घर बाहिर जानुपर्ने अबस्था आए मास्कको अनिवार्य प्रयोग गर्न पनि आग्रह गरिएको छ । आफ्नो गाउँमा बिदेशबाट आएका कुनै ब्यक्तिहरु भए वडामा जानकारी दिन पनि आग्रह गरिएको छ ।
यस्तै धादिङकै थाक्रे गाउँपालिकाले पनि अत्याबश्यक बाहेकका सबै सेवा पूर्ण रुपमा बन्द गर्ने निर्णय गरेको छ । यसैक्रममा धादिङको सिद्धलेक गाउँपालिका एक हप्तासम्म बन्द गरिने भएको छ । बिहिबार पालिका स्तरिय विपद व्यवस्थापन समितिको बैठक बसी गाउँपालिका भित्र साउन ३० गते देखि लागू हुने गरि अत्यावश्यक बाहेकका सबै सेवा एक हप्ता वन्द गरिने निर्णय गरेको हो । बैठकले गाउँपालिकाभित्र संक्रमण रोकथामका लागी भोलि शुक्रबारदेखी भदौ ४ गते सम्मका लागी गाउँपालिका र अन्तरगतका वडा कार्यालयहरुमा अत्त्यावश्यक बाहेकका सबै सेवा बन्द गर्ने निर्णय गरिएको गाउँपालिकाका प्रमुख प्रशाशकिय अधिकृत धनेश्वर पौडेलले बताए ।
