विगत ६ वर्षयता बलिउडमा अभिनेत्री दिशा पटानीले ठूला व्यानरका फिल्ममा काम त गरिन्, तर आफूलाई पहिचान दिने खालको भूमिकामा अभिनय गर्न पाइनन् । अभिनेता टाइगर श्राफसँगको प्रेम र सामाजिक सञ्जालमा रंगीन उत्तेजक तस्वीर पोस्ट गरेर चर्चामा आइन् ।
उनको पछिल्लो फिल्म ‘राधे’ र ‘एक भिलेन रिटर्नस’ बक्सअफिसमा कमजोर साबित भयो । हालका दिनमा हिन्दी फिल्मको बक्स अफिस कमजोर बन्दै गएको छ । बलिउडमा साउथको दबदबाले जोकोही बलिउडका कलाकार साउथमा भूमिकाको खोजीमा छन् । दिशाले पनि साउथमा एक–दुईवटा फिल्म पाएकी छन् । तर यो बहानामा उनले बलिउडको एक ठूलो फिल्म गुमाउनु परेको छ ।
निर्माता एकता कपुरले उनलाई होम प्रोडक्सन फिल्म ‘केटिना’ बाट निकालेकी छन् । दिशाले सन् २०१९ मा फिल्मका लागि हस्ताक्षर गरेकी थिइन् । फिल्मको सुटिङ कोरोनाअघि नै सुरु भएको थियो । यो फिल्मका लागि दिशाले ८ दिनको सुटिङ गरेकी थिइन् । तर कोरोना सुरु भएपछि फिल्मको काम रोकियो । एजेन्सी
