धादिङ । राष्ट्रिय लोक तथा दोहोरी गीत प्रतिष्ठान नेपालको अध्यक्षमा धादिङकी रिता थापा मगर सर्वसम्मत निर्वाचित भएकी छन् ।
शुक्रबारदेखि धादिङबेसीमा जारी प्रतिष्ठानको आठौं केन्द्रिय महाधिवेशनबाट थापा सर्वसम्मत अध्यक्षमा निर्वाचित भएकी हुन् । केन्द्रिय निर्वाचन समितिले भर्खरै सार्वजनिक गरेको उम्मेदवारको नामावली अनुसार थापाको विरुद्ध उम्मेदवारी नै नपरेपछि उनी सर्वसम्मत भएकी छन् । लोक तथा दोहोरी क्षेत्रमा दशक अघिदेखि तल्लीन थापा मगर यसअघि प्रतिष्ठानको विभिन्न पदमा रहेर काम गरेकी थिइन् ।
महाधिवेशनले ३५ जनाको पदाधिकारीसहित ७५ सदस्यीय कार्यसमिति चयन गर्नेछ ।हिजो शुक्रबार राती नै मनोनयन दर्ता खुल्ला गर्ने कार्यतालिका भएपनि सर्वसम्मतको कसरतले आज शनिबार दिउँसो १२ बजेपछि मात्रै मनोनयन खुल्ला गरिएको थियो । सर्वसम्मत नभएका पदहरुमा भने मतदान गराउने निर्वाचन समितिले जनाएको छ ।
