आज तराई–मधेस क्षेत्रमा होली पर्व मनाइँदै छ । मुलुकका पहाडी तथा हिमाली क्षेत्रमा होली मनाएको भोलिपल्ट आज सोमबार तराई–मधेसमा होली मनाउने गरिएको छ ।
वसन्त ऋतुको आगमनसँगै आपसी मेलमिलाप र सद्भावनाको सन्देश लिइ आउने फागू पर्व विभिन्न रङ र लोला खेली मनाउने परम्परा छ ।
त्रेता युगमा दैत्यराज हिरण्यकश्यपुले विष्णुभक्त आफ्ना पुत्र प्रह्लादलाई मार्ने उद्देश्यले ब्रह्माबाट आगोले छुन नसक्ने वरदान पाएकी आफ्नी बहिनी होलिकालाई प्रह्लादका साथ दन्किरहेको आगोमा पस्न लगाउँदा होलिका आफैँ भष्म भएकी तर भक्त प्रह्लादलाई आगोले छुन नसकेको कथा यो पर्वसँग जोडिएको छ ।
त्यसै बेलादेखि शक्तिको दुरूपयोग गर्ने पापी प्रवृत्तिकी प्रतीक बनेकी होलिका मारिएको उपलक्ष्यमा होली ९फागु० खेल्ने परम्परा चलेको जनविश्वास छ ।
तराई क्षेत्रमा होलीमा जोगिरा गीत गाउने चलन छ भने आफन्तहरू मिलेर रंगहरु दलेर एकापसमा खुसीयाली साटासाट गर्ने चलन रहँदै आएको छ । होलीका अवसरमा मधेसका जिल्लाहरुमा आज सार्वजनिक बिदा दिइएको छ ।
