सर्लाहीको बागमती नगरपालिकास्थित रायमाझी चोकमा आज बिहान सवारी दुर्घटनामा हुदा तीन जनाको मृत्यु भएको छ।
पूर्वपश्चिम राजमार्गस्थित बागमती नगरपालिका –११, रायमाझी चोकमा रोकेर राखेको लरीमा यात्रीबाहक बस ठोक्किँदा रुपन्देहीको मायादेवी गाउँपालिका निवासी हरिबहादुर चौधरी, ८५ वर्षका दशरथ कोहार र ५० वर्षका रामकरण केवटको मृत्यु भएको प्रहरीले जनाएको छ।
घटनालगत्तै उद्धार गरी उनीहरुलाई हरिवनस्थित नमूना अस्पताल पुर्याएकामा चिकित्सकले मृत घोषणा गरेको इलाका प्रहरी कार्यालयका प्रहरी निरीक्षक अनिलराज गिरीले जानकारी दिए। दुर्घटनामा गम्भीर घाइते भएकाहरुको जनकपुर, वीरगञ्ज तथा स्थानीय अस्पतालमा उपचार भइरहेको छ। रुपन्देहीबाट जनकपुरतर्फ गईरहेको बस दुर्घटनामा परेको हो। बसमा ४० जना सवार रहेको प्रहरीले जनाएको छ।
