नेपाल धितोपत्र बोर्डले रिलायन्स स्पिनिङ मिलको आईपीओ बुक विल्डिङ प्रणालीमार्फत ल्याउने योजना हाललाई स्थिगित गर्ने भएको छ । नियमन विभागको विभागिय बैठकले अर्को सूचना नआएसम्म कम्पनी आइपीओ रोक्ने निर्णय गरेको हो ।
कम्पनीलाई आइपीओ निष्कासन अनुमित दिँदा घोटाला भएको विषय संघीय संसदको सार्वजनिक लेखा समितिमा प्रश्न उठे पछि बोर्ड आइपीओ प्रक्रिया रोक्ने निर्णयमा पुगेको हो ।
रिलायन्सले यसअघि बुक विल्डिङ प्रणालीमार्फत संस्थागत लगानीकर्तालाई आईपीओ बिक्री गरिसकेको थियो। तर, सर्वसाधारणलाई आईपीओ जारी गर्नका लागि तयार पारिएको वित्तीय विवरणमा प्रक्षेपण गरिएको प्रतिसेयर आम्दानीमा ठूलो अन्तर देखिएपछि लेखा समितिले बोर्डलाई एक हप्ताभित्र स्पष्टता माग गरेको थियो।
लेखा समितिले वित्तीय विवरणमा म्यानुपुलेशन भएको आरोप लगाउँदै जबाफ माग गरेको थियो। रिलायन्सको आईपीओ लामो समयदेखि विद्युत महशुल बक्यौता विवादका कारण रोकिएको थियो।
