नुवाकोटको विदुर नगरपालिकाले जेहेनदार, गरिब तथा विपन्न विद्यार्थीलाई प्राविधिक शिक्षा अध्ययनका लागि पूर्ण छात्रवृत्ति उपलब्ध गराएको छ । नगरको नीति तथा कार्यक्रम एवम् बजेटमा उल्लेख भएअनुसार ‘मेयर छात्रवृत्ति’ कार्यक्रममार्फत १५ जना विद्यार्थीलाई प्राविधिक विषय अध्ययनका लागि आवश्यक सबै शुल्क छात्रवृत्ति स्वरूप उपलब्ध गराएको हो ।
तोकिएको कार्यविधिअनुसार १५ जनाले पूर्ण छात्रवृत्तिमा पशु विज्ञान र बाली विज्ञान अध्ययन गरिरहेका छन् । ‘नगरका जेहेनदार तथा गरिब स्थानीय विद्यार्थीलाई प्राविधिक शिक्षा अध्ययन छात्रवृत्ति प्रदान गर्ने’ सम्बन्धी कार्यविधि–२०७७ अनुसार छात्रवृत्ति रकम प्रदान गरिएको छ । विदुर नगरपालिकाले ‘मेयर छात्रवृत्ति’ कार्यक्रममार्फत प्राविधिक विषयमा तीन वर्षे डिप्लोमा तह र प्राविधिक उच्च शिक्षाअन्तर्गत चिकित्सक, इन्जिनियर, पशु चिकित्सक, वनविज्ञान अध्ययनको लागिसमेत पूर्ण छात्रवृत्ति उपलब्ध गराउने मेयर राजन श्रेष्ठले जानकारी दिए ।
