काठमाडौं । साताको चौथो कारोबार दिन नेपाल स्टक एक्सचेन्ज (नेप्से)मा उच्च अंकको गिरावट आएको छ ।
बुधबारको कारोबारमा बजार ९०.७३ अंकको गिरावट आएको हो । योसँगै बजार मापक २७३९.४६ विन्दुमा कायम छ । साताको पहिलो कारोबार दिनमा ५३ अंकले घटेको बजार दोस्रो कारोबार दिनमा भने १२७ अंकले बढेको थियो । यस्तै, मंगलबार बजार ६ अंकले बढेको थियो ।
उच्च अंकले बजार घट्दा ३१ कम्पनीको सेयर मूल्य बढेको छ । यस्तै, २१३ कम्पनीको सेयर मूल्य घटेको छ । घट्दो बजारमा एक्सेल डेभलपमेन्ट बैंक, विन नेपाल लघुवित्त, सामुदायिक लघुवित्त, समाज लघुवित्त तथा इस्टर्न हाइड्रोपावरको सेयर मूल्यमा सकारात्मक सर्किट लागेको छ ।
यस दिन १२ अर्ब ९२ करोड ५६ लाख रुपैयाँ बराबरको दुई करोड ६५ लाख ८४ हजार १९२ कित्ता सेयर एक लाख ३७ हजार १६३ पटकमा खरिद–बिक्री भएको छ । ९० अंकले बजार घट्दा सम्पूर्ण उपसूचक समूह राताम्मे देखिएका छन् ।
