धादिङ । बेनिघाट रोराङ गाउँपालिका भित्रका विद्यालयको शैक्षिक गुणस्तर सुधार गर्न श्रोत संकलन गर्ने उद्देश्यले गाउँपालिकाले सप्ताह ज्ञान महायज्ञ सञ्चालन गर्ने भएको छ ।
शैक्षिक गुणस्तरमा सुधार गरेर सम्वन्धित समुदायको जीवनमा आर्थिक सामाजिक रुपान्तरण गर्न सकिने भन्दै यसकालागि गाउँपालिकाको आर्थिक श्रोत कम भएकोले श्रोत संकलनकालागि महायज्ञ लगाउन लागेको गाउँपालिकाका अध्यक्ष कृष्णबहादुर थपलियाले बताउनु भयो ।
गाउँपालिकामा बिहिवार पत्रकारहरुसंग कुराकानी गर्दै अध्यक्ष थपलियाले हालै वडा नम्वर ८ मा सञ्चालनमा ल्याएको एकिकृत छात्राबासले शैक्षिक गुणस्तर सुधार र बालबालिकाको पढ्न पाउने अधिकारलाई बलियो बनाउने उद्देश्यले महायज्ञ लगाउन लागिएको बताउनु भयो। उहाँले जनसहभागितामा आधारित विकास र जनसहभागितामा आधारित शासन व्यवस्थाको कार्यान्वयनको लागि पनि यस्ता कार्यक्रमले टेवा पुग्ने विश्वास व्यक्त गर्नुभयो ।
त्यसैगरि प्रमुख प्रशासकीय अधिकृत नर्वदा घिमिरेले श्रोत संकलनका विभिन्न उपायहरु मध्ये महायज्ञ पनि एक भएको बताउँदै सबै धर्म र संस्कृति अनुसारका कार्यक्रम मार्फत श्रोत संकलन गरिने दाबी गर्नुभयो ।
बेनिघाट रोराङ गाउँपालिका आयोजक भएर सञ्चालन हुने सप्ताह ज्ञान महायज्ञ आगामी माघ १७ देखि २३ सम्म चल्ने गाउँपालिकाका प्रवक्ता एवम् वडा नं. ५ का अध्यक्ष रोशन कुमार सिलवालले जानकारी दिनु भयो । महायज्ञमा भागवत मञ्जरी राधिका दासीले कथा वाचन गर्ने बेनिघाट रोराङ गाउँपालिकाले जनाएको छ ।
गाउँपालिका अध्यक्ष कृष्ण बहादुर थपलिया विवेकको अध्यक्षतामा सम्पन्न पत्रकार सम्मेलनमा उपाध्यक्ष टाप बहादुर श्रेष्ठ, प्रमुख प्रशासकिय अधिकृत नर्वदा घिमिरे,वडा न. ७ का वडा अध्यक्ष कुमार बस्नेत लगायत जनप्रतिनिधिहरुको उपस्थिति रहेका थिए ।
