धादिङ । धादिङको बेनीघाट रोराङ गाउँपालिकाले शैक्षिक सुधारका लागि श्रीमद्भागवत सप्ताह ज्ञान महायज्ञ सुरु गरेको छ । ‘शिक्षाको लागि भिक्षा’ अभियान चलाएर आज (विहिबार)बाट सुरु गरिएको महायज्ञ माघ २३ गतेसम्म संचालन हुने छ । चरौंदी खेल मैदानमा सुरु भएकोे महायज्ञमा मञ्जरी राधिका दासीले भागवतको कथा वाचन गर्नेछिन् । महायज्ञको बिहीवार राष्ट्रियसभाका अध्यक्ष नारायण प्रसाद दाहालले उद्घाटन गरेका हुन् ।

बेनीघाट रोराङ गाउँपालिका भित्रका सामुदायिक विद्यालयको सवलीकरण मार्फत गुणस्तरीय शिक्षामा सबैको समतामुलक पहुँच स्थापित गराउने उद्देश्यले गाउँपालिकाले नै श्रीमद्भागवत सप्ताह सुरु गरेको हो । आमा बाबु नभएका र विशेष संरक्षणको आवश्यकता भएका बालबालिकाको लालन पालन, पोषण र शिक्षादीक्षा सुनिश्चित गर्न यो महायज्ञले सहयोग पुग्ने गाउँपालिकाका अध्यक्ष कृष्णबहादुर थपलियाले बताउनु भएको छ ।

गाउँपालिकामा आवश्यकता अनुसार आवासीय विद्यालयको विस्तार गरी संचालन तथा व्यवस्थापनमा महायज्ञको आम्दानी लगानी हुनेछ । ‘विपन्न, दलित, सीमान्तकृत चेपाङ समुदायको आर्थिक सामाजिक रुपान्तरण गर्न, गरिबी र बञ्चितिकरणको पुस्तान्तरण चक्रलाई तोड्ने लक्ष रहेको अध्यक्ष थपलियाले बताउनु भएको छ ।

बेनीघाट रोराङ गाउँपालिकाको शैक्षिक उत्थानमा योगदान गर्ने र अध्यात्मिक स्वास्थ्य प्रवर्धन मार्फत् समाजमा बिग्रदै गएको मानसिक स्वास्थ्यको रक्षा गर्ने पनि महायज्ञको उद्देश्य रहेको गाउँपालिकाका उपाध्यक्ष टाप बहादुर श्रेष्ठले बताउनु भयो । ‘हामी शैक्षिक सुधारको सवालमा एकजुट भएर काम गर्दै आएका छौं । त्यसैले शिक्षाको लागि भिक्षा मागिएको यस अभियानमा हुनेले नहुनेका लागि, सक्नेले नसक्नेका लागि खुला उदार मनले सहयोग गर्न आग्रह गरिएको उपाध्यक्ष श्रेष्ठको भनाइ छ ।

गाउँपालिकाले वडा नम्बर ८, विदाङमा रहेको कालिका माध्यमिक विद्यालयलाई आवासीय विद्यालय संचालन गरिरहेको छ । गाउँपालिकाको १६ औं गाउँसभाले विभिन्न माध्यमबाट संकलन हुने श्रोतको कोष सञ्चालन तथा व्यवस्थापनलाई व्यवस्थित गर्न ‘शैक्षिक उत्थान कोष व्यवस्थापन ऐन–२०८१’ समेत पारित गरि कार्यान्वयनमा ल्याईसकेको छ । यहि ऐनको आधारमा कोषको रकम परिचालन गर्ने र शैक्षिक सुधारका कार्यक्रममा सञ्चालन हुने उपाध्यक्ष श्रेष्ठले बताउनु भयो ।महायज्ञमा बेनीघाट रोराङका एक सय ४७ जना कर्मचारीले एक महिनाको तलब दान दिने भएका छन् । यसो गर्दा कर्मचारीहरुबाट मात्रै ४७ लाख रुपैंया भागवतमा संकलन हुने भएको छ ।