✍️ भाइकाजी तिवारी
देश संघीयतामा गए पछि धेरै विकास हुन्छ, देशमै रोजगारी हुन्छ युवाहरुले देशमै रोजगारी पाउँछन् अनि समुन्नत नेपाल खुसी नेपालीको सपना पुरा होला भनेको तर यसको विपरित भइरहेको देखिन्छ ।

कुनै पनि जनप्रतिनिधि सँग जनता खुसी भएको देखिँदैन । सामाजिक सन्जालका राखिएका विभिन्न विषयका पोष्टहरुमा राम्रो कमेन्ट भन्दा पनि अधिकाँश नराम्रो वा नकारात्मक कमेन्ट देखिन्छ । यसलाई एउटा जनप्रतिनिधि र पार्टीको जिम्मेवार व्यक्तिको हैसियत बाट हेर्दा मलाई पनि देशमा पुनः संविधान संशोधन गरेर राज्य पुनर्संरचना गर्नु पर्ने लगायत अन्य धेरै कुरा सुधार गरेमात्र र धेरै चालू खर्च कटौती गर्न सके मात्र देश विकासले तिव्रता पाउन सक्छ ।

सुधार्नु पर्ने तथा संविधान संशोधनमा समेट्नुपर्ने विषय
१. संघीय साँसद एउटा जिल्लामा एक जना भए पुग्छ ।
२. संघमा अहिले भएको समानुपातिक संसदमा ५०% कटौती गर्नु पर्ने देखिन्छ ।
३. प्रदेश सभा खारेज गरेर प्रदेश प्रमुख, स्थानीय जनप्रतिनिधि मेयर, उपमेयर, अध्यक्ष, उपाध्यक्षको भोटिङ बाट प्रत्यक्ष निर्वाचन गर्ने र त्यसको सदस्य स्थानीय जनप्रतिनिधि प्रमुख र उपप्रमुख हुँदा ठूलो खर्च कटौती हुन्छ ।
४. जिल्ला समन्वय समिती खारेज गर्नु पर्छ ।
५. अहिलेको प्रदेश क्षेत्रलाई पालिका बनाउनु पर्छ ।
६. पहिलेको साविक गाविसलाई वडा बनाई अझ वडालाई अधिकार सम्पन्न बनाई साना योजनाको रकम वडाबाट भुक्तानी गर्ने व्यवस्था हुनुपर्छ । यसले गर्दा ठूलो मात्रामा अनावश्यक कर्मचारी पनि कटौती हुन्छ ।
७. राष्ट्रबाट पाउने सेवा सुविधा जातको आधारबाट होइन वर्गको आधारमा हुनुपर्छ । अनि मात्र समान हुन्छ ।
८. देशको जनताहरुलाई विभिन्न वर्गमा विभाजन गरी सामाजिक सुरक्षा भत्ता पूर्ण रूपमा वर्गको आधारमा वितरण गर्नु पर्ने देखिन्छ अनि मात्र ठूलो रकम चालू खर्चबाट बचत गरी देश बिकासमा खर्च गर्न सकिन्छ ।
९.प्रत्यक्ष निर्वाचित कार्यकारी राष्ट्रपति वा कार्यकारी प्रधानमन्त्री हुनुपर्छ ।

यी माथिका बुँदाहरू नै देशका बहुसंख्यक नागरिकहरुको चाहना हो भन्ने मेरो विचारमा लाग्दछ ।

लेखक तिवारी गल्छी गाउँपालिका धादिङको उपाध्यक्ष तथा नेपाली काङ्ग्रेस धादिङका जिल्ला सदस्य हुनुहुन्छ ।