‘सडकमै खाउँ, सडकमै नाचौँ, सडकमै रमाऊँ’ भन्ने नाराका साथै विगत २६ वर्षदेखि निरन्तर रहेको पोखरास्थित लेकसाइड सडक महोत्सवले यसवर्ष पनि निरन्तरता पाउने भएको छ । आगामी पुस १३ गतेदेखि पाँच दिनसम्म चल्ने सडक महोत्सव २७औँ हुनेछ ।
उक्त महोत्सवलाई सफल पार्नका लागि रेवानका प्रथम उपाध्यक्ष वसन्त गौतमलाई संयोजक बनाइएको छ । कार्यसमिति सदस्य सुनीलबहादुर भट्टराई र सुमन भट्टराईलाई सहसंयोजकको जिम्मेवारी दिने निर्णय गरेको छ । पोखरा सडक महोत्सव संचालन गर्नका लागि गठित ‘स्टेरिङ कमिटी’मा अध्यक्ष विश्वराज पौडेल, निवर्तमान अध्यक्ष नरेश भट्टराई, संयोजक वसन्त गौतम, द्धितीय उपाध्यक्ष विकास भट्टराई, महासचिव वीरेन्द्र शेरचन र कोषाध्यक्ष रोशनजंग कार्कीसहित ६ जनालाई राखिएको छ ।
पोखरामा आन्तरिक तथा बाह्य पर्यटकलाई आकर्षित गर्नका लागि विगत २६ वर्षदेखि महोत्सव गर्दै आएको रेवानले जनाएको छ । सडक महोत्सवले पोखराको पर्यटन प्रबर्धनमा सहयोग पु¥याएको रेवानका महासचिव शेरचनले जानकारी दिए । महोत्सवले लोपोन्मुख सामग्री र संस्कृतिको संरक्षणमा समेत सहयोग पुग्दै गएको बताइएको छ । सडक महोत्सव पोखराको लेकसाइडको फिस्टेल गेटदेखि खहरेसम्मको करिब तीन किलोमिटर सडक क्षेत्रमा हुँदै आएको छ ।
