धादिङ । कुमारी बैंक लिमिटेड शाखा कार्यालय महादेवबेसी धादिङले दुर्घटनामा परी निधन हुनुभएका स्वर्गीय उत्तमप्रसाद अर्यालकी श्रीमती सीता अर्याललाई दुर्घटना बीमा बापत १० लाख रुपैयाँको चेक हस्तान्तरण गरेको छ।
गएको कात्तिक १७ गते बेलुका करिब ६ः३० बजे धुनिबेसी नगरपालिका–०६, धार्केबाट घर फर्कने क्रममा थाक्रे गाउँपालिका–०७, किलोमा भएको मोटरसाइकल दुर्घटना हुँदा अर्यालको निधन भएको थियो।
कुमारी बैंकको “कुमारी परिवार सुरक्षा बचत खाता” अन्तर्गत उपलब्ध दुर्घटना बीमा सुविधाअनुसार स्वर्गीय अर्यालको परिवारले प्राप्त गर्ने रु १०,००,०००/- (अक्षरेपी दश लाख रुपैयाँ मात्र) बराबरको बीमा रकमको चेक बैंकले हस्तान्तरण गरेको जनाएको छ।
बैंकका अनुसार उक्त सुरक्षा बचत खातामार्फत ग्राहकहरूलाई विभिन्न बीमा सुविधासहित वित्तीय सुरक्षा प्रदान गर्दै आएको छ। यस किसिमको बीमा सुविधाले आकस्मिक दुर्घटनाबाट प्रभावित परिवारलाई आर्थिक सहारा पुग्ने विश्वास बैंकले व्यक्त गरेको छ।
