धादिङको थाक्रे गाउँपालिका वडा नम्बर ५ तसर्पू, दामेचौरमा रहेको प्रेम सागर फाउन्डेशन नेपालद्धारा सञ्चालीत जनभोजन कार्यक्रमले आफ्नो १७ औं वार्षिकोत्सव मनाएको छ ।
वि.स २०६५ साल चैत्र २८ गतेबाट सञ्चालन भएको जनभोजन कार्यक्रमले आज शनिबार एक कार्यक्रमका विच वार्षिकोत्सव मनाएको छ । स्थापना कालबाट दैनिक रुपमा ५ सय जना भन्दा बढि विद्यार्थी तथा बृद्ध आमाबुवाहरुलाई खाना खुवाउर्दै आएको जनभोजन कार्यक्रमले केही वर्ष अगाडीबाट धादिङको थाक्रे गाउँपालिका वडा नम्बर ४,५,७,८ र मकवानपुरको थाहा नगरपालिका वडा नम्बर ११, १२ का १८ वटा विद्यालयमा दैनिक २ हजार भन्दा बढि विद्यार्थीहरुलाई दिवा खाजा खुवाउँदै आएको जनभोजन कार्यक्रमका व्यवस्थापक भोला राउतले बताए ।

जनभोज कार्यक्रममा वार्षिक रुपमा १ करोड ४० लाख ३५ हजार ३२८ सय भन्दा बढि खर्च भएको संस्थाका महासचिव दुर्गादत्त घिमिरेले बताए। उहाँका अनुसार विभिन्न सहयोगी दाताहरुबाट प्राप्त र अन्य संस्थाहरुबाट सहयोग रुपमा दिएको रु.५४ लाख आम्दानी भएको भनाई छ । अहिले दैनिक रुपमा ४० हजार खर्च हुने गरेको संस्था महासचिव घिमिरेको भनाई छ ।

कार्यक्रममा बोल्नु हुँदै थाक्रे गाउँपालिकाका अध्यक्ष तथा कार्यक्रमका प्रमुख अतिथि राम कुमार आचार्यले जनभोजन कार्यक्रमले विद्यालय र विद्यार्थीमा आएको परिवर्तनको उच्च प्रशंसा गर्दै विगतका वर्षहरुमा पालिकाबाट दिदै आएको आर्थिक सहयोगलाई निरन्तरता दिने बताउनु भएको छ ।

रजनी लामाले संचालन गर्नु भएको कार्यक्रममा संस्थाका उपाध्यक्ष प्रेमराज ढुङगेलको अध्यक्षता तथा थाक्रे गाउँपालिका अध्यक्ष रामकुमार आचार्यको प्रमुख आतिथ्यता रहेको थियो । कार्यक्रममा थाहा नगरपालिकाका उपप्रमुख भरत गोपाली,थाक्रे गाउँपालिकाका पुर्वउपाध्यक्ष अम्बिका रुपाखेती,थाक्रे ५ का वडा अध्यक्ष सन्त बहादुर तामाङ, वडा नम्बर ७ का युवराज खतिवडा, थाहा १२ का वडा अध्यक्ष टिकाराम तामाङ, धादिङ र मकवानपुरमा विभिन्न विद्यालयका प्रअ तथा शिक्षक, सहयोगी दाताहरु लगायतको सहभागिता रहेको थियो।