स्वास्थ्य तथा जनसंख्यामन्त्री नीशा मेहताले अस्पताल तथा स्वास्थ्य संस्थाहरूमा नयाँ निर्देशन जारी गरेकी छन् । अबदेखि अस्पताल परिसरमा सम्बन्धित संस्थाको पूर्वस्वीकृतिबिना (नियमविपरीत) भिडियो वा फोटो खिच्ने, अन्तर्वार्ताको नाममा भिडभाड गर्ने र उपचारमा खटिएका स्वास्थ्यकर्मीको काममा अवरोध पुर्याउने कार्यमा पूर्ण रोक लगाइएको छ ।
बिरामीको गोपनीयता हनन हुने यस्ता गैरकानुनी कार्य गर्ने जो कोहीलाई "मुलुकी अपराध संहिता २०७४" र "स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६" बमोजिम कडा कारबाही हुने चेतावनी दिइएको छ । उपचारको क्रममा कमी-कमजोरी भएको महसुस भए अस्पताल तोडफोड वा होहल्ला गर्नुको साटो सम्बन्धित निकायमा तथ्यपरक उजुरी दिन आग्रह गरेकी छन् ।
