वाग्मती प्रदेश सरकारले प्रशासनिक संरचनामा पुनर्संरचना गर्दै प्रदेशअन्तर्गतका कार्यालयहरूको संख्या घटाएको छ । कार्यालयहरूको संख्या २०१ बाट घटाएर १९१ मा झारिएको छ । बिहीबार बसेको प्रदेश मन्त्रिपरिषद् बैठकले आठ मन्त्रालय मातहत १९१ कार्यालय रहने गरी नयाँ संगठनात्मक संरचना स्वीकृत गरेको हो ।
सरकारका प्रवक्ता तथा आर्थिक मामिला तथा योजनामन्त्री प्रभात तामाङका अनुसार मुख्यमन्त्री तथा मन्त्रिपरिषद्को कार्यालयको प्रस्तावमा प्रदेशभर सञ्चालनमा रहेका अस्थायी, दोहोरो तथा कम प्रभावकारी कार्यालयहरूको पुनरावलोकन गरी केही कार्यालय गाभ्ने, केही खारेज गर्ने र आवश्यकताअनुसार नयाँ कार्यालय स्थापना गर्ने निर्णय गरिएको हो ।
