कम्पनी रजिष्ट्रारको कार्यालयमा दर्ता हुने नयाँ कम्पनीहरूले अब अनलाइन प्रणालीबाटै आफ्नो स्थायी लेखा नम्बर र सोको प्रमाणपत्र प्राप्त गर्न सक्ने भएका छन् । कार्यालयले आफ्नो विद्युतीय प्रणालीलाई आन्तरिक राजस्व विभागको प्रणालीसँग अन्तरआबद्धता गरेपछि यो सुविधा कार्यान्वयनमा आएको हो ।
कम्पनी रजिष्ट्रारको कार्यालय र आन्तरिक राजस्व विभागबीच २०८३ साल वैशाख ३१ गते विद्युतीय प्रणालीमा आबद्ध हुने सम्बन्धी एक समझदारीपत्रमा हस्ताक्षर भएको थियो । सोहीबमोजिम विकास गरिएको प्रणालीलाई कार्यालयको केमिस प्रणालीमा समावेश गरी असार १५ गतेदेखि सफलतापूर्वक ुलाइभु गरिएको कार्यालयले जनाएको छ ।
यस नयाँ व्यवस्थाअनुसार, अब कम्पनी रजिष्ट्रारको कार्यालयमा दर्ता हुने कम्पनीहरूले पान र त्यसको प्रमाणपत्रका लागि छुट्टै झन्झट बेहोर्नुपर्ने छैन । सेवाग्राहीले कार्यालयको केमिस प्रणालीमार्फत नै सिधै प्यान प्रमाणपत्र डाउनलोड गरी प्रिन्ट गर्न सक्नेछन् । आम सेवाग्राही तथा सरोकारवालाहरूको सहजताका लागि यो सूचना प्रकाशन गरिएको कम्पनी रजिष्ट्रारको कार्यालयले उल्लेख गरेको छ ।
