धादिङको गल्छी गाउँपालिका धादिङ जिल्लाकै पहिलो बालमैत्री स्थानीय शासनयुक्त पालिका घोषणा हुने भएको छ । गाउँपालिकालाई बालमैत्री स्थानीय शासनयुक्त घोषणा गर्न बागमती प्रदेश सरकारले सहमति प्रदान गरेसँगै गल्छी धादिङको पहिलो बालमैत्री पालिका बन्ने बाटो खुलेको हो ।
बागमती प्रदेश सरकार, मुख्यमन्त्री तथा मन्त्रिपरिषद्को कार्यालयअन्तर्गतको शासकीय सुधार तथा समन्वय महाशाखाले गल्छी गाउँपालिकालाई बालमैत्री स्थानीय शासन घोषणा गर्न सहमति प्रदान गरेको छ ।
गल्छी गाउँपालिकाले बालमैत्री स्थानीय शासन घोषणाका लागि आवश्यक कागजातसहित प्रदेश सरकारसमक्ष अनुरोध गरेको थियो । सोही अनुरोधका आधारमा बालमैत्री स्थानीय शासन कार्यान्वयन निर्देशिका, २०७८ र बालमैत्री स्थानीय शासन घोषणा कार्यविधि, २०७९ बमोजिम गठित प्रदेशस्तरीय अनुगमन समितिको अनुगमन प्रतिवेदनसमेतका आधारमा गाउँपालिकालाई बालमैत्री स्थानीय शासन घोषणा गर्न सहमति प्रदान गरिएको प्रदेश सरकारको पत्रमा उल्लेख छ । प्रदेश सरकारको पत्रअनुसार २०८३ साल साउन २८ गते मुख्यमन्त्रीस्तरबाट भएको निर्णयका आधारमा गल्छी गाउँपालिकालाई बालमैत्री स्थानीय शासनयुक्त पालिका घोषणा गर्न सहमति प्रदान गरिएको हो ।
बालमैत्री स्थानीय शासनका आवश्यक सूचक तथा मापदण्ड पूरा गर्ने क्रममा गल्छी गाउँपालिकाले यसअघि विभिन्न वडाहरूलाई समेत बालमैत्री स्थानीय शासनयुक्त वडा घोषणा गर्दै आएको छ । गाउँपालिकाले बालअधिकार, बाल संरक्षण, शिक्षा, स्वास्थ्य, बाल सहभागितालगायतका क्षेत्रमा विभिन्न कार्यक्रम सञ्चालन गर्दै आएको छ । प्रदेश सरकारबाट सहमति प्राप्त भएसँगै अब आवश्यक प्रक्रिया पूरा गरी गल्छी गाउँपालिकालाई धादिङ जिल्लाकै पहिलो बालमैत्री स्थानीय शासनयुक्त पालिका घोषणा गर्ने तयारी अघि बढ्ने भएको छ ।
बालमैत्री स्थानीय शासन घोषणाले गाउँपालिकामा बालबालिकाको अधिकार संरक्षण, अर्थपूर्ण सहभागिता, बालमैत्री सेवा प्रवाह तथा बालबालिकामैत्री योजना निर्माण र कार्यान्वयनलाई थप संस्थागत गर्ने अपेक्षा गरिएको छ ।
