धादिङ । धादिङको गल्छी गाउँपालिकाले बाढी प्रभावित परिवारलाई राहतस्वरूप प्रतिपरिवार १० हजार रुपैयाँ वितरण गरेको छ।
बुधबार आएको आकस्मिक बाढीका कारण गल्छी गाउँपालिका–६ बैरेनी क्षेत्रका ११५ भन्दा बढी घरपरिवार विस्थापित भएका छन्। बाढीले बस्तीमा ठूलो परिमाणमा हिलो र लेदो थुपारेपछि स्थानीयवासीको जनजीवन प्रभावित बनेको छ।
गाउँपालिका अध्यक्ष केदारनाथ खतिवडाले गाउँपालिकाभित्र ११५ भन्दा बढी घर विस्थापित भएको जानकारी दिनुभयो। उहाँका अनुसार बुधबार बिहान सम्भावित जोखिमको सूचना प्राप्त हुनासाथ स्थानीयवासीलाई सुरक्षित स्थानमा जान आग्रह गरिएको थियो, जसका कारण मानवीय क्षति हुनबाट जोगिन सहयोग पुगेको थियो।
बाढीपछिको अवस्थामा प्रभावित क्षेत्रको सरसफाइ तथा हिलो पन्छाउने प्रयास भइरहेको भए पनि अत्यधिक हिलोका कारण काममा कठिनाइ भइरहेको अध्यक्ष खतिवडाले बताउनुभयो।
गाउँपालिकाले प्रभावित परिवारलाई तत्काल राहत उपलब्ध गराउनुका साथै पुनःस्थापना र आवश्यक सहयोगका लागि थप पहल गरिरहेको जनाएको छ।
