धादिङ । गल्छी गाउँपालिकाले चालु आर्थिक वर्ष २०८३/८४ का वार्षिक कार्यक्रमबारे जानकारी गराउने उद्देश्यसहित पशुपन्छी घुम्ती शिविर तथा स्थलगत तालिम सञ्चालन गर्ने भएको छ । गाउँपालिकाको पशु सेवा शाखाले सार्वजनिक गरेको सूचना अनुसार असोज १९ गतेदेखि २७ गतेसम्म विभिन्न वडामा शिविर तथा तालिम सञ्चालन गरिनेछ ।
यसअघि असोज ९ गतेदेखि सञ्चालन गर्ने भनिएको कार्यक्रम त्रिशूली नदीमा आएको बाढीका कारण प्रभावित भएपछि नयाँ मिति निर्धारण गरिएको गाउँपालिकाले जनाएको छ ।
कार्यक्रमअन्तर्गत गाउँपालिकाका विभिन्न वडामा पुगेर पशुपन्छीसम्बन्धी घुम्ती शिविर तथा स्थलगत तालिम सञ्चालन गरिनेछ । कार्यक्रम बिहान १०ः३० बजेदेखि दिउँसो ४ बजेसम्म सञ्चालन हुनेछ ।
गाउँपालिकाले सार्वजनिक गरेको तालिकाअनुसार असोज १९ गते वडा नम्बर ५ को वडा कार्यालय थालचौर, २० गते वडा नम्बर १ को वडा कार्यालय डुम्रीचौर र २१ गते वडा नम्बर ८ को वडा कार्यालय गोगनपानीमा कार्यक्रम हुनेछ ।
त्यस्तै, असोज २२ गते वडा नम्बर २ को वडा कार्यालय बरभन्ज्याङ, २३ गते वडा नम्बर ३ को वडा कार्यालय आमडाँडा, २६ गते वडा नम्बर ४ को चिरौंदीभन्याङ आधारभूत स्वास्थ्य सेवा केन्द्र र २७ गते वडा नम्बर ६ को बागेश्वरी आधारभूत विद्यालय बाहुनपलाङमा कार्यक्रम सञ्चालन गरिने सूचनामा उल्लेख छ ।
गाउँपालिकाले सम्बन्धित वडाका सरोकारवाला तथा पशुपन्छी पालक कृषकहरूलाई तोकिएको मिति, समय र स्थानमा उपस्थित भई कार्यक्रमबाट लाभ लिन अनुरोध गरेको छ ।
हेर्नुहोस् सुचना :
