शिवराज आचार्य
धार्के, धादिङ । स्वास्थ्यका लागी खेलकुद, राष्ट्रका लागी खेलकुद भन्ने नाराका साथ धादिङको धुनिबेशीमा आईतबार बाट नवौँ राष्ट्रपति रनिङ शिल्ड प्रतियोगिता सुरु भएको छ । धुनिबेशी नगरपालिका वडा नम्बर ५ को भुवनेश्वरी माध्यमिक विद्यालयको खेल मैदानमा प्रतियोगिता सुरु भएको हो ।
प्रतियोगितामा नगरपालिकाको १५ वटा सामुदायिक र संस्थागत माध्यमिक विद्यालयहरुको सहभागीता रहेको छ । नगर प्रमुख बालकृष्ण आचार्यले पानसमा बत्ति बालेर प्रतियोगिताको उत्घाटन गर्नु भएको हो । प्रतियोगितामा भलिबल, कवड्डी, एथ्लेटीक्स तर्फ, हाइजम्प, लङजम्प, ट्रिपलजम्प, ज्याम्लीङ थ्रो, सटपुट, र ट्रयाक तर्फ एक सय मिटर, दुई सय मिटर, चार सय मिटर, आठ सय मिटर, पन्ध्र सय मिटर र एक सय मिटर रिले दौड हुने प्रतियोगिता संयोजन गर्ने भुवनेश्वरी माध्यमिक विद्यालयका प्रधानाध्यापक गणेश रेग्मीले जानकारी दिनु भएको छ ।
उत्घाटन कार्यक्रममा ११ वटा माध्यमिक विद्यालयका विद्यार्थीहरुले मार्चपास गरेका थिए । आज ट्रयाक तर्फका प्रतियोगिता भएका छन्। कार्यक्रममा बोल्नु हुदै नगर प्रमुख आचार्यले खेल क्षेत्रलाई विस्तार गर्दै लैजाने बताउनु भएको छ । केहि समय भित्रमा नगरले भिन्न किसिमको प्रतियोगिता आयोजना गने उहाँको भनाई छ । उहाँले प्रतियोगिताको सफलताको कामना समेत गर्नु भएको छ । आईतबारबाट सुरु भएको प्रतियोगिता २९ गते मँगलबार सम्म सञ्चालन हुने छ ।
२०७६ पुस २७ गते प्रकाशित
