बुङपुङ । धादिङको बेनिघाट रोराङ वडा नम्बर ६ बुङपुङमा दिगो सामुदायिक रुपान्तरणका लागि सामुदायिक व्यवस्थापन गोष्ठी भएको छ । सामुदायिक विकासका लागि स्थानिय स्तरमा गठन भएका समुहहरुलाई व्यवस्थित दिगो र स्वाबलम्बी बनाई सामुदायिक विकास प्रक्रियामा महत्वपुर्ण भुमिका निर्वाह गर्न सहयोग पुग्ने लक्ष्यका साथ गोष्ठीको आयोजना गरिएको शान्ति नेपाल सँस्थाले जनाएको छ । २ दिन सम्म भएको गोष्ठिमा शान्ति नेपालद्धारा सन्चालित सामुदायिक पोषण तथा खाद्य सुरक्षा परियोजनाका परियोजना सँयोजक लाल प्रसाद पोखरेल र फिल्ड अधिकृत अर्चिता उप्रेतीले सहजिकरण गर्नुभएको थियो । गोष्ठीमा सामुदायिक विश्लेषण गरिनुका साथै सामुदायिक कार्ययोजना र सामुदायिक आचारसँहिता तयार गरिएको छ । कार्ययोजना कार्यान्वयन र नियमनका लागि शिव चेपाङको सँयोजकत्वमा ९ सदस्यिय योजना कार्यान्यवन र मुल्याङ्कन समिती निर्माण गरिएको छ । ४८ घरधुरी रहेको बुङपुङमा गाउँको राम्रो पक्ष र सुधार गर्नु पर्ने पक्षहरुका बारेमा पनि छलफल भएको छ । २ सय ९२ जना जनसँख्या रहेको उक्त गाउँमा ४८ घर मध्ये २४ घरमा मात्र शौचालय रहेको छ । अब सबै घरले शौचालय निर्माण गरेर बुङपुङ गाउँको सुधार गर्नुपर्ने गोष्ठीमा बताईएको छ । उनिहरुले चैत्र १५ भित्र शौचालय निर्माण गरि त्यसको सुरक्षित प्रयोग गर्ने बताएका छन् । कच्ची सडक गाउँमा पुगेको छ भने आधारभुत विद्यालय र खानेपानीको सुविधा उक्त गाउँमा छ । खानेपानीको लागि फिल्टर प्रयोग गर्ने उनिहरुको भनाई छ । साथै बालबालिकालाई विद्यालय नियमित रुपमा पठाउने लगायतका प्रतिवद्धता व्यक्त गरिएको छ । बुङपुङमा ३६ घरलाई १२ महिना खान पुग्छ भने ९ घरलाई ६ महिना, २ घरलाई ४ महिना र १ घरलाई ३ महिना मात्र खान पुग्ने अवस्था रहेको छ । उक्त समुदायमा पोषण तथा खाद्य सुरक्षाको लागि अहिले शान्ति नेपालले काम गरिरहेको छ । सोहि गोष्ठीमा बुङपुङमा रहेका ४ जना कुपोषित बालबालिकाहरुलाई सर्वोत्तम पिठो पनि वितरण गरिएको छ ।