धादिङ । वागमती प्रदेशको सामाजिक विकास मन्त्रालयले विद्यालय बस सेवा कार्यक्रमको लागि २५ वटा विद्यालय छनौट गरेको छ । मन्त्रालयको चालु आर्थिक वर्षको स्वीकृत कार्यक्रम अन्तर्गत विद्यालय बस सेवा अनुदानको कार्यक्रमको लागि “विद्यालय बस सेवा कार्यक्रम सञ्चालन कार्यविधि २०७६” बमोजिम प्रदेश भित्रको १३ जिल्लाका २५ विद्यालय छनौटमा परेका हुन् ।
मन्त्रालयद्धारा प्रकासित सूचना अनुसार धादिङका दुई विद्यालय छनौटमा परेका छन् । गल्छि गाउँपालिकामा रहेको बागेश्वरी मावी र बेनिघाट रोराङ गाउँपालिकामा रहेको बागेश्वरी मावी छनौटमा परेका हुन् । यस्तै नुवाकोट जिल्लाका दुई विद्यालय विद्यालय बस सेवा कार्यक्रमको लागि छनौटमा परेको छ । छनौटमा परेको विद्यालयहरुमा बेलकोटगढी नगरपालिकामा अवस्थित महादेव माध्यामिक विद्यालय र विदुर नगरपालिकामा रहेको चण्डेश्वरी माध्यामिक विद्यालय रहेका छन् ।
त्यसैगरी रसुवाको कालिका गाउँपालिकामा रहेको कालिका हिमालय माध्यामिक विद्यालय छनोटमा परेको छ । यो सहित २५ विद्यालय छनौटमा परेका हुन् ।
मन्त्रालयमा शुक्रवार स्थानीय तहको जनप्रतिनिधि, सम्वन्धित विद्यालयका प्रधानाध्यापक र विद्यालय व्यवस्थापन समितिसँग त्रिपक्षीय सम्झौता गरिने सार्वजनिक गरिएको सूचनामा उल्लेख गरिएको छ ।
