धादिङ । धादिङको गल्छीचोकमा स्थापना गरिएको हेल्प डेस्कले आठ सय भन्दा बढीलाई सहयोग गरेको छ । हेल्प डेस्कले हिँडेर आएकाहरूलाई रोकेर आराम गराई खाजा खुवाउनुका साथै उनीहरूको स्वास्थ्य अवस्थाको जानकारी लिएर सामान्य खालका समस्या भए औषधी दिनुका साथै गन्तव्यसम्म मोटर चढाएर पठाइदिने गरेको हा् । हेल्प डेस्क स्थापना भएपछि अन्य ठाउँबाट हिँड्दै आए पनि गल्छीबाट भने कसैलाई हिँडेर जान नदिइएको र जुन मोटर भेटिन्छ त्यसैमा चढाएर पठाउने गरिएको गल्छी प्रहरी चौकीका इन्चार्ज प्रहरी सहायक निरीक्षक सुरेन्द्र शाहले बताउनुभयो । । अहिले गल्छी प्रहरी चौकीले हेल्प डेस्कको सञ्चालन गरिरहेको छ भने गल्छी गाउँपालिका वडा नं–७ का अध्यक्ष हरि खतिवडाले यसको प्रत्यक्ष संयोजन गरिरहेका छन् । खतिवडाको संयोजनमा रहेको स्थानीय स्वयंसेवक टोलीले पैदलयात्रा गरेर आएकाहरूलाई गल्छीमा रोकेर सहयोग गरिरहेको नेपाल रेडक्रस सोसाइटी बैरेनी उपशाखाका उपसभापति केशव रिमालले बताउनुभयो । अहिलेसम्म यहाँबाट आठ सय जनाभन्दा बढीलाई गन्तव्यमै पुग्ने गाडी चढाएर पठाइसकिएको वडा अध्यक्ष खतिवडाको भनाई छ । हेल्प डेस्कले रोकेर पानी, खाजा खुवाउनुका साथै उपलब्ध मोटर चढाएर गन्तव्यसम्म पठाउने गरेको गल्छी गाउँपालिकाका प्रमुख प्रशासकीय अधिकृत मोहनकुमार श्रेष्ठले बताउनु भयो । यस्तै बन्दाबन्दिको समय थपिँदै जाँदा आवश्यकता अनुसार वडाबाट सिफारिस भएका दैनिक ज्यालादारी मजदुर लगायतलाई राहत वितरणको काम भईरहेको गाउँपालिकाका उपाध्यक्ष राधा तिमल्सिनाले बताउनुभयो । यसका साथै गाउँपालिकाका अध्यक्ष कृष्णहरी श्रेष्ठले सबै वडाका स्वास्थ्य सँस्थाबाट नियमित सेवा प्रवाह गरिएको बताउनुभएको छ । उहाँका अनुसार विभिन्न सँघ सँस्थाहरु सँग समन्वय गरी थप जटिल परिस्थीती आईपरे यसको सामाना गर्न सक्ने गरी पालिकास्तरिय कोरोना रोकथाम समिती र वडा स्तरिय सँयन्त्र निर्माण गरिएको छ ।