अहिले आएको दोस्रो भेरियन्ट सहितको कोभिड–१९ को लहर भयानक डरलाग्दो देखिएकोले जिल्ला प्रशासन कार्यालय, धादिङले बैशाख २१ गते देखि ३१ गतेसम्म जिल्ला भर निशेधाज्ञा जारी गरेको जानकारी अवगत नै छ । यस समयमा रुघा, खोकी लाग्ने र पि.सि.आर. गर्दा दिनहुं धेरै जनामा पोजिटिभ देखापरेकोले सबै जनाले स्वास्थ्य मापदण्ड अपनाऔ र स्वास्थ्य तथा जनसंख्या मन्त्रालयको सूचनाको पालना गरौं ।
यो समयावधिमा घर भित्रै बसौं, अत्यावश्यक काममा मात्रै बाहिर निस्कने बानी बसालौ । अहिलेको समयमा यस दोस्रो भेरियन्ट सहितको कोभिड–१९ को कारण दिनप्रतिदिन संक्रमण बढ्दै गइरहेको र मृत्यु हुनेको संख्या पनि बढिरहेकोले आफ्नो तर्फबाट कुनैपनि हेलचेक्राइ नगर्नहुन अनुरोध गर्दछौ । यस महामारीबाट आफू पनि बचौ र अरुलाई पनि बचाऔ, यसको लागि माक्स लगाऔ, बारम्बार स्यानिटाइजरले हात सफा राखौ र साबुन पानीले हात धुऔ । अहिले अस्पतालमा बिरामी राख्ने, भर्ना गर्ने ठाउँ छैन ।
यदि कोभिड–१९ पोजिटिभ देखिएमा आफ्नै घरमा आइसोलेसनमा बस्नुहोला । यदि कोही संक्रमितलाई स्वासप्रस्वासमा कठिनाइ आएमा र अक्सिजनको आवश्यक परेमा गल्छी गाउँपालिका वडा नं. ७को डल्टारको नमुना बागेश्वरी क्याम्पसको भवनमा आवश्यक सामान तथा उपकरण सहित आइसोलेसन हाउस तयार गरिएको छ, त्यहाँ गई उपचार गर्नुहुन अनुरोध गरिन्छ । साथै विदेशबाट आउने सबै मानिसहरुलाइ अनिवार्य रुपमा २ हप्ता होम आइसोलेसनमा बस्न/बसाउन आग्रह गर्दछौ ।
अहिले प्रत्येक स्थानीय तहमा भूमिहिन दलित, भूमिहिन सुकुम्बासी र अव्यव्यस्थीत बसोबासीको लगत संकलन भर्ने फारम भर्न भिडभाड नगर्नुहोला । जिल्लाले निषेधाज्ञा घोषणा गरे अनुसार बजारका खाद्यान्न, तरकारी, दुध डेरी जस्ता विभिन्न पसलहरुमा भिडभाड नगरी विहान ०६ः०० बजेबाट बिहान ०९ः०० बजेसम्म मात्र पसल खोल्न हुन सबै महानुभाव मित्रहरुमा अनुरोध गर्दछु । गल्छी गाउँपालिकामा पनि केही कर्मचारीलाई कोभिड–१९को संक्रमण पुष्टि भैसकेको हुँदा पालिकामा धेरै भिडभाड नगरिकन कामकाज गर्नुहुन र साथै बैंक तथा वित्तिय संस्थाहरुमा पनि भिडभाड नगरिदिनुहुन अनुरोध छ ।
कृष्णहरि श्रेष्ठ
अध्यक्ष, गल्छी गाउँपालिका
यो पनि हेर्नुहोस् ।
कर्मचारीमा कोरोना सँक्रमण देखिएपछि गल्छी गाउँपालिकामा अत्यावश्यक बाहेक अन्य सेवा बन्द
