अन्तर्राष्ट्रिय सीमानाकाबाट नेपाल प्रवेश गर्ने भारतीय नागरिकले अनिवार्य रूपमा परिचयपत्र बोक्नुपर्ने भएको छ । परिचयपत्रबिनाका विदेशी अवैध प्रवेश गर्न थालेपछि त्यसलाई रोक्न भारतीयले परिचयपत्र बोक्नुपर्ने व्यवस्था गरेको हो ।
तेस्रो देशका नागरिक दक्षिणका सीमानाकाबाट गैरकानुनी रूपमा नेपाल प्रवेश गर्न थालेपछि सरकारले भारतीय नागरिकको सहज पहिचानका लागि आवागमनमा परिचयपत्र अनिवार्य गरेको हो । कार्यवाहक प्रधानमन्त्री एवं गृहमन्त्री बालकृष्ण खाँणको अध्यक्षतामा शुक्रबार सीमानाका व्यवस्थापन र सीमा अपराध रोकथाम तथा नियन्त्रणमा केन्द्रित भएर केन्द्रीय सुरक्षा समितिको बैठक बसेको थियो । बैठकमा सेना, प्रहरी, सशस्त्र प्रहरी, राष्ट्रिय अनुसन्धान विभाग र अध्यागमन विभागका अधिकारीले भारतीयको भेषमा तेस्रो देशका नागरिक घुसपैठ गरी नेपाल भित्रिने गरेको भन्दै नियन्त्रणका लागि थप कदम चाल्न गृहमन्त्री खाँणलाई सुझाव दिएका थिए । त्यसको भोलिपल्ट शनिबार गृहमन्त्री खाँणले भारतीय नागरिक नेपाल प्रवेश गर्दा साथमा परिचयपत्र बोक्नुपर्ने प्रावधानसम्बन्धी निर्णयमा हस्ताक्षर गरेका हुन् । आजको कान्तिपुर दैनिकमा खबर छ । फाइल तस्बिर ।
