उसको सोचमा
सिर्जनशिलता, व्यबहारमा शुद्दता आयो रे
उसको मनमा मानवियता, मस्तिकमा विद्वता छायो रे
ओहो उ पोजेटिभ भयो रे !
उसको सोच्ने तरिका र
बोल्ने लवज फेरियो रे,
उसको हेर्ने दृष्टिकोण र व्याख्यान बिधि फेरियो रे
ओहो उ पोजेटिभ भयो रे !
कालो लाई रातो देख्ने उसको आखाँ फेरियो रे
असललाई खराव भन्ने उसको भाका फेरियो रे
ओहो उ पोजेटिभ भयो रे !
दम्भ र घमण्ड उसको सबै तोडियो रे
लोभ र स्वार्थ सवै छोडियो रे
ओेहो उ पोजेटिभ भयो रे !
उसले फुललाई लात्ती हान्ने कर्म छोड्यो रे
अरुको दुखमा आरती गर्ने धर्म फेरो रे
ओहो उ पोजेटिभ भयो रे !
उसमा आफैँ मात्रै बिद्वान देख्ने भ्रम हट्यो रे
विकृतिको खेती गर्ने श्रम घट्यो रे
ओेहो उ पोजिटिभ भयो रे !
उ शिक्षा विनाको शिक्षक
दिक्षा विनाको दार्शनिक बन्न छोड्यो रे
उ भिक्षा विनाको पनि सहयोगी वन्न थाल्यो रे
ओहो उ पोजेटिभ भयो रे !
उसले नैतिकता विनाको राजनिती छोड्यो रे
उसले मानवियता विनाको पिरति छोड्यो रे
ओहो उ त पोजेटिभ भयो रे !
उ अचेल भट्टिमा विकासको भिजन खोज्दैन रे
उसले गफ र आश्वासनमा समृद्धिको रेखा कोर्देन रे
ओहो उ पोजेटिभ भयो रे !
उ आफु नबदलिई समाज बदल्न खोज्दैन रे
उ आफ्नो बारी नखनी अरुको खेदो खन्दैन रे
ओहो उ पोजेटिभ भयो रे !
यि मेरा सपनाहरु निन्द्रामा सिमित भयो रे
सोच त उसको यथावतै नै थियो,
पोजेटिभ त उसलाई कोरोना पो भयो रे !!
- थाक्रे १०, धादिङ ।
