धादिङ। बागमती प्रदेशमा डेंगु संक्रमित संख्या तीन हजार नाघेको छ । स्वास्थ्य मन्त्रालयका अनुसार भदौ १ गते शुक्रबारसम्म प्रदेशका १३ जिल्लामा तीन हजार एकसय १९ जनामा डेंगु संक्रमण पुष्टि भएको छ ।
डेंगु संक्रमणका कारण धादिङ,मकवानपुर र चितवनमा एक–एक जना सङ्क्रमितको मृत्यु भएको स्वास्थ्य मन्त्रालयका सूचना अधिकारी डा. रविन भुसालले जानकारी दिनुभयो ।
प्रदेशका १३ जिल्लामा १ जनवरी २०२३ देखि हालम्म सबैभन्दा बढी धादिङमा डेंगु पुष्टि भएको छ । मन्त्रालयको तथ्याङ्कअनुसार धादिङमा २ हजार १३०, काठमाडौँमा २११, मकवानपुरमा १७७, ललितपुरमा १५८, चितवनमा १२८, भक्तपुरमा ११७, नुवाकोटमा ७१, रामेछापमा ३८, काभ्रेपलाञ्चोक ३५, सिन्धुलीमा २४, सिन्धुपाल्चोक र दोलखामा १२–१२ जनामा डेंगु पुष्टि भएको छ ।
सबैभन्दा कम रसुवामा ६ जनामा डेंगु पुष्टि भएको स्वास्थ्य मन्त्रालयले जनाएको छ । प्रदेशमा शुक्रवार एक सय ३६ जनामा डेंगु पुष्टि भएको तथ्याङ्क छ ।
