धादिङको थाक्रे गाउँपालिका वडा नं ३ को मल्डुङ खेल मैदानमा बृहत सोनाम ल्होछार सांस्कृतिक कार्यक्रम, विश्व शान्ति पुजा तथा रक्तदान कार्यक्रम सम्पन्न भएको छ। तामाङ समुदायको सांस्कृतिक पर्व २८६१ औं सोनाम ल्होछारको अवसरमा प्रगतिशिल युवा क्लवको आयोजना र थाक्रे गाउँपालिकाको आर्थिक सहयोग तथा नेपाल तामाङ घेदुङ थाक्रेको संयोजकत्वमा शनिवार बृहत रुपमा कार्यक्रम सम्पन्न भएको हो।
कार्यक्रममा थाक्रे गाउँपालिका वडा नं ३ का वडा अध्यक्ष विजय तामाङ, थाक्रे गाउँपालिकाका एमाले अध्यक्ष गणेशमान वाइबा, थाक्रे गाउँपालिकाका अध्यक्ष रामकुमार आचार्य, नेकपा एमालेका नेता तथा पूर्व सांसद भुमी प्रसाद त्रिपाठी र पूर्व कानुन मन्त्री तथा नेपाल तामाङ घेदुङ संघका केन्द्रीय सदस्य शेर वहादुर तामाङले शुभकामना दिनुभएको थियो। यस्तै साँस्कृतिक सँगै भएको रक्तदान कार्यक्रममा ४८ जनाले रक्तदान गरेको प्रगतिशील युवा क्लवका अध्यक्ष निकेश तामाङले बताउनुभयो ।
प्रगतिशील युवा क्लवका अध्यक्ष निकेश तामाङको सभापतित्वमा सम्पन्न कार्यक्रममा नेपाल सरकारका पूर्व कानुन मन्त्री तथा नेपाल तामाङ घेदुङ संघका केन्द्रीय सदस्य शेर वहादुर तामाङको प्रमुख आतिथ्यता, नेकपा एमालेका नेता तथा पूर्व सांसद भुमी प्रसाद त्रिपाठी र थाक्रे गाउँपालिकाका अध्यक्ष रामकुमार आचार्यको विशेष आथित्यता रहेको थियो।
त्यसैगरी नेपाल तामाङ घेदुङ संघका जिल्ला अध्यक्ष, उपाध्यक्ष, थाक्रे गाउँपालिकाका विभिन्न वडाका वडा अध्यक्षहरु, विभिन्न पार्टीका स्थानिय नेताहरु, विद्यालयका प्रधानाध्यापकहरुको आतिथ्यता रहेको थियो।
