धादिङ । यस वर्षको माध्यमिक शिक्षा परीक्षा (एसईई) को नतिजा सार्वजनिक भएको छ । धादिङ जिल्लाभरबाट ६२ दशमलव ७५ प्रतिशत विद्यार्थी उर्तीण भएका छन् ।
उत्तीर्ण विद्यार्थीहरुमध्ये ८ जना विद्यार्थीले ४ जीपीए ल्याएका छन् । ४ जीपीए ल्याउनेमा सामुदायिक विद्यालयहरुबाट ५ जना विद्यार्थीहरु रहेका छन् भने ३ जना सामुदायिक विद्यालयबाट रहेका छन् ।
सामुदायिक विद्यालयतर्फ नीलकण्ठ ३ धादिङवेशीमा रहेको नीलकण्ठ बालमन्दिर माविबाट सन्ध्या तिमल्सिना, नीलकण्ठ ७ तल्लोबेशीमा रहेको सुनौलोभैरवी माविबाट प्रशंषा श्रेष्ठ, गजुरीको गजुरी पिडा माविबाट ईश्वर भण्डारी, र गल्छीको मास्टारमा रहेको जनकल्याण माविबाट २ जना समृद्धि ढकाल र सौरभी वाग्ले रहेका छन् ।
त्यसै गरी निजी विद्यालयहरुबाट धादिङवेशीमा रहेको न्यु किवो बोर्डिङ स्कुलबाट २ जना आयुष शर्मा र समिर भण्डारी र चिल्डेनपार्क बोर्डिङबाट प्रिसिला तामाङ रहेका छन् ।
त्यसै गरी धादिङ जिल्लाबाट ५ हजार ४७५ जनाले परिक्षा दिएका थिए । शिक्षा विकास तथा समन्वय इकाई धादिङका अनुसार यस वर्ष एसईई परीक्षामा धादिङका सामुदायिकबाट १ सय ३४, संस्थागतबाट १८ र प्राईभेट २ वटा बिद्यालयबाट नियमिततर्फ ४ हजार ३ सय ४७, प्राविधिकतर्फ १ सय ६४, ग्रेड वृद्धितर्फका ९ सय ३२ र खुल्ला तर्फ ३२ जना एसईईमा सहभागी थिए ।
यो वर्षको देशभरको नतिजामा ६१ दशमलव ८१ प्रतिशत विद्यार्थी ग्रेडेड अर्थात् उत्तीर्ण भएका छन्।
