कक्षा १२ को परीक्षामा बेनीघाट रोराङ गाउँपालिकाका ६८.७३ प्रतिशत विद्यार्थी उत्तीर्ण भएका छन् । हालै सार्वजनिक भएको नतिजा अनुसार बेनीघाट रोराङका कुल ३२३ जनामध्ये २२२ विद्यार्थी उत्तीर्ण भएका हुन् ।
नतिजा अनुसार ब्राइटफ्युचर मावि (मलेखु) शतप्रतिशत विद्यार्थी उत्तीर्ण गराउन सफल भएको छ । यस माविबाट परीक्षामा सहभागी भएका १० जनामध्ये १० जना नै उत्तीर्ण भएका छन् ।
त्यसैगरी शंखादेवी मावि, मझिमटारका ३९ जनामध्ये ३५ जना, अर्थात् ८९.७४ प्रतिशत, राष्ट्रिय मावि, खोरभञ्ज्याङका १४ जनामध्ये ११ जना अर्थात् ७८.५७ प्रतिशत, बागेश्वरी मावि, रिचोकटारका १७० जनामध्ये १२५ जना अर्थात् ७३.५३ प्रतिशत विद्यार्थी उत्तीर्ण भएका छन् ।
त्यस्तै पिपलभञ्ज्याङ मावि, ताल्तीका १७ जनामध्ये ११ जना अर्थात् ६४.७१ प्रतिशत र चन्द्रोदय मावि, विशालटारका ७३ जनामध्ये ३० जना अर्थात् ४१.१० प्रतिशत विद्यार्थी उत्तीर्ण भएका छन् ।
यस वर्ष समग्र राष्ट्रिय नतिजालाई हेर्दा कुल ६१.१७ प्रतिशत विद्यार्थी उत्तीर्ण भएका छन् । बेनीघाट रोराङको नतिजा राष्ट्रिय नतिजाभन्दा राम्रो देखिएको छ ।
