यो वर्षको दसैँ अवधिमा वर्षाको पूर्वानुमान गरिएको छ । मौसमविद्ले हिले दसैँ हुने सम्भावना औँल्याएका हुन् । त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलले आउँदो साता पानी पार्ने प्रणाली मनसुन फेरि हुन सक्ने जनाएका छन् । मनसुन सक्रिय र हिले दसैँको सम्भावना उनले औँल्याएका हुन् ।
घटस्थापनादेखि एक सातासम्म मनसुन त्यति सक्रिय नदेखिने उनले उल्लेख गरेका छन् । तर, साँझ तथा बेलुका केही ठाउँमा वर्षा हुने सम्भावना बाँकी नै रहेको बताएका छन् । पर्यावरण तथा मौसमविद् उज्ज्वल उपाध्यायले पनि मनसुन पुनः सक्रिय हुने सम्भावना कायम रहेको जनाएका छन् ।
देशमा मौसमको निगरानी गर्ने आधिकारिक निकाय जल तथा मौसम विज्ञान विभागकी मौसमविद् विनु महर्जनले पनि केही दिनपछि मनसुन पुनः सक्रिय हुने पूर्वानुमान रहेको बताएकी छन् ।
दसैँको टीकासम्म मनसुन नेपालबाट नबाहिरिए पनि ठूलो वर्षा र झरीको सम्भावना नरहेको जलवायुविज्ञ डा। धर्मराज उप्रेतीको भनाई छ ।
