देशका केही स्थानमा आउँदो बुधबार फेरि वर्षाको सम्भावना रहेको मौसमविद्ले बताएका छन् । हालको वर्षा रोकिएर अर्को मौसम प्रणालीले पानी पार्ने मौसमविद्ले उल्लेख गरेका छन् ।
त्रिभुवन विश्वविद्यालयको जल तथा मौसम विज्ञान विषयका सहप्राध्यापक डा. विनोद पोखरेलले मंगलबार बेलुकादेखि पश्चिम नेपालमा वर्षा र हिमपात हुन सक्ने बताएका छन् । बंगालको खाडीमा विकसित चक्रवात ‘मोन्था’को असर देशमा अझै बाँकी रहेको उनले जनाएको छ । त्यसकै प्रभावले शनिबार बिहानैदेखि काठमाडौंलगायत आधा पूर्वी नेपालमा वर्षा भइरहेको उनको भनाइ छ ।
बुधबार भने पश्चिमी वायुको प्रभावले काठमाडौंसम्म वर्षाको सम्भावना उनले औँल्याएका छन् । बुधबार हुने पूर्वानुमान गरिएको वर्षा हल्का मात्र हुने उनले जनाएका छन् । मौसम पूर्वानुमान महाशाखाले भने देशमा हाल पश्चिमी वायु र अरबसागरमा बनेको न्यूनचापीय प्रणालीको प्रभाव रहेको जनाएको छ ।
