पूर्वपश्चिम राजमार्गअन्तर्गत नारायणगढ–बुटवलखण्डको गैँडाकोटमा रातिको समयमा मात्र सडक विस्तारको काम भइरहेको छ । नारायणी नदीको पुलबाट पश्चिमतर्फ १७० मिटर सडक कालोपत्रसँग जोडिन बाँकी रहेकाले रातिमा काम अगाडि बढाइएको हो ।
नारायणगढ–बुटवल सडक आयोजना पूर्वी खण्डका सूचना अधिकारी इन्जिनियर शिव खनालले हरेक दिन राति १० देखि भोलिपल्ट बिहान ४ बजेसम्म काम भइरहेको बताए ।
दिनमा यो सडकमा काम गर्दा सवारीसाधनको लामो जाम भएकाले ट्राफिक व्यवस्थापनमा समस्या देखिएपछि रातिमा काम थालिएको उनले बताए । कार्यतालिकाबमोजिम प्रगति हासिल भएमा अबका १० दिनमा यो सडकमा कालोपत्र गरेर सकिने सूचना अधिकारी खनालले जानकारी दिए ।
