नागढुंगादेखि नौबिसेसम्मको १२.२६ किलोमिटर सडकमध्ये ६२.६४ प्रतिशत इन्टरमिडिएट लेनको हुने भएको छ । नागढुंगा–मुग्लिन सडक योजना पूर्वीखण्डका प्रमुख केशवप्रसाद ओझाका अनुसार यस प्याकेजअन्तर्गतको सडक ७.६८ किलोमिटर इन्टरमिडिएट लेन (सिंगल लेनभन्दा फराकिलो तर दुई लेन भन्दा साँघुरो) मा विस्तार गरिने भएको छ । विशेषगरी दुई लेनमा विस्तार गर्न नसकिने जटिल खालको भूगोलमा इन्टरमिडिएट लेन निर्माण गरिन्छ ।
यस्तै यस प्याकेजमा २.४१ किलोमिटर सडक डेडिकेटेड दुई लेनमा विस्तार गरिँदैछ । २.१७ किलोमिटर सडक ४ लेनमा विस्तार भइरहेको छ । यो खण्ड १ अर्ब ३० करोड रुपैयाँ लागतमा जाङ्सु–सगुन जेभीले २०७८ चैत २९ गते २४ महिनाभित्र स्तरोन्नति सम्पन्न गर्नेगरी सम्झौता भएको थियो । तर डेढ वर्षपछि मात्रै विस्तार थालिएको यो सडक २०८१ जेठ २८ गते सक्नुपर्नेमा नसकिएपछि २०८१ माघसम्मका लागि म्याद थपियो ।
उक्त म्यादमा नसकिएपछि दोस्रोपटक २०८२ साउन १० गतेसम्मका लागि म्याद थप गरिएको थियो । तर त्यस अवधिमा सम्पन्न हुन सकेन र आगामी फागुनसम्म म्याद थप गरिएको थियो । यो प्याकेज हालसम्म ८० प्रतिशत भौतिक प्रगति भएको छ ।
