धादिङको गल्छी गाउँपालिकामा पालिका स्तरीय निबन्ध लेखन प्रतियोगिता सम्पन्न भएको छ । “बालमैत्री अभियानमा बाल क्लबले दिएको अवसर र मेरो भूमिका” शीर्षकमा आयोजित उक्त प्रतियोगितामा वडा नं. १ की रोजिना खतिवडा प्रथम हुनुभएको छ ।
गाउँपालिकाको कार्यपालिका हलमा आयोजित उक्त प्रतिस्पर्धामा विभिन्न वडाका १४ जना बालबालिकाहरूले आफ्नो लेखन कला प्रस्तुत गरेका थिए ।
निर्णायक मण्डलको मूल्यांकन अनुसार वडा नम्बर १ की रोजिना खतिवडा १५४ अँक सहित प्रथम, वडा नम्बर ४ का दिनेश श्रेष्ठ १४८.५ अंक सहित द्वितीय र वडा नम्बर ५ का उमेश सुनार १४७ अंक सहित तृतीय भएका छन् । प्रथम, दृतिय र तृतिय हुनेहरुलाई मेडल, प्रमाणपत्र र कापी प्रदान गरिएको पालिका बालमैत्री सहजकर्ता विपिन मल्लले बताउनुभयो ।
यसैबिच कार्यक्रमका प्रमुख अतिथि एवं गल्छी गाउँपालिकाका अध्यक्ष श्री केदारनाथ खतिवडाले बालबालिकाहरूको सिर्जनशीलताको प्रशंसा गर्नुभएको छ । उहाँले यस्ता खालको प्रतियोगिताले बालबालिकालाई आफ्नो अधिकार र जिम्मेवारीप्रति सचेत गराउने पनि बताउनुभयो ।
गल्छी बाल समुह सञ्जालका श्रद्धा रिमालको अध्यक्षतामा सम्पन्न उक्त कार्यक्रमको सञ्चालन संगिता श्रेष्ठले गर्नुभएको थियो । कार्यक्रमलाई व्यवस्थित बनाउन अतिरिक्त कार्यक्रम संयोजक विषम श्रेष्ठले संयोजन गर्नुभएको थियो ।
कार्यक्रममा गाउँपालिकाका विभिन्न क्षेत्रका बालबालिकाहरूका साथै बालमैत्री सहजकर्ताहरूको उपस्थिति रहेको थियो ।
