धादिङ । प्रतिनिधिसभा निर्वाचन क्षेत्र नं.१ मा नेपाली कम्युनिस्ट पार्टी का उम्मेद्वार राजेन्द्र प्रसाद पाण्डेले नीतिगत सुधार, सुशासन र दिगो विकासलाई आफ्नो मुख्य प्राथमिकता बनाएका छन्।

गजुरी गाउँपालिकाका विभिन्न वडामा आज आयोजित घरदैलो कार्यक्रममा उनले पार्टीको लामो राजनीतिक संघर्ष, नेतृत्व अनुभव र समाजवादप्रतिको स्पष्ट प्रतिबद्धताले आफूलाई बलियो बनाएको बताए।

“देशको समृद्धि र समाजवाद स्थापनाका लागि हाम्रो पार्टीले निरन्तर भूमिका खेलेको छ। जनतामा हाम्रो पार्टीप्रति विश्वास बढ्दो छ,” पाण्डेले भने ।
पाण्डेले कानूनी तथा नीतिगत सुधारलाई पहिलो एजेन्डा बनाउने स्पष्ट सन्देश दिएका छन्। उनका अनुसार जनताले भोगिरहेका प्रशासनिक जटिलता, ढिलासुस्ती र भ्रष्टाचारजन्य प्रवृत्तिको अन्त्य बिना समृद्धि सम्भव छैन।

“सेवाग्राहीले सास्ती होइन, सहज सेवा पाउनुपर्छ। त्यसका लागि नीतिगत हस्तक्षेप अपरिहार्य छ,” उनले जोड दिए। धादिङ–१ क्षेत्रमा अझै पनि सडक, विद्युत, शिक्षा र स्वास्थ्य पूर्वाधारमा देखिएका समस्या समाधानका लागि प्रदेश र स्थानीय सरकारसँग प्रभावकारी समन्वय गरेर अघि बढ्ने योजना उनले सार्वजनिक गरेका छन्।

उनले विकासलाई कागजी नारा नभई व्यवहारिक उपलब्धिमा रूपान्तरण गर्ने प्रतिबद्धता दोहोर्‍याए। कृषि उपजको सहज बजारीकरण, पशुजन्य तथा दुग्धजन्य उत्पादनको वैज्ञानिक प्रशोधनमार्फत किसान र उपभोक्ता दुवैलाई लाभ पुग्ने वातावरण निर्माण गर्ने उनको योजना छ।

विदेश पलायनलाई चिन्ताजनक विषय ठहर गर्दै उनले भने—“यो देशमा केही गर्न सकिँदैन भन्ने भाष्य अन्त्य गर्नुपर्छ। अस्पताल, प्राविधिक शिक्षा र कृषि क्षेत्रमा सुधार गरेर देशमै अवसर सिर्जना गर्नुपर्छ।”

पाण्डेले पपुलिज्मभन्दा माथि उठेर सुशासन, समावेशिता, धर्मनिरपेक्षता र संघीयताको पक्षमा दृढतापूर्वक उभिने बताएका छन्। किसान, मजदूर, दलित, मधेसी र मुस्लिम समुदायको अधिकार संरक्षणमा आफ्नो पार्टी सधैं प्रतिबद्ध रहेको उनको दाबी छ।

अन्त्यमा उनले भने—“समृद्ध धादिङ निर्माणका लागि मेरो उम्मेदवारी हो। जनताको मतले यो अभियान सफल हुनेछ भन्ने विश्वास लिएको छु।”

घरदैलो कै क्रममा गजुरी २ मा आज नेकपा एमाले निकट राष्ट्रिय युवा संघ नेपाल धादिङको जिल्ला कमिटी सदस्य रविन्द्र घले (लुरी) सहित १५ जना युवाहरु नेपाली कम्युनिस्ट पार्टी प्रवेश गरेका छन् । नव प्रवेशीलाई उम्मेदवार पाण्डे र बागमती प्रदेशका पूर्व मुख्यमन्त्री शालिकराम जम्कटेलले स्वागत गर्नु भयो ।

धादिङ–१ मा पाण्डेको यो एजेन्डाले चुनावी माहोललाई नीतिगत बहसतर्फ मोड्ने संकेत देखिएको छ।