पाल्पाको माथागढी गाउँपालिका–७, रहबासमा शनिबार साँझ टिपर दुर्घटना हुँदा तीनजनाको मृत्यु भएको छ । एकजना गम्भीर घाइते छन् । दुर्घटनामा परी अर्घाखाँचीको शितगंगा नगरपालिका–४, सिधाराका चालक चिन्ताबहादुर सुनारको मृत्यु भएको छ । ज्यान गुमाएका अरू दुईजनाको पहिचान खुल्न बाँकी छ । पाल्पाको तानसेन नगरपालिका–१०, पटुवाका ३३ वर्षीय राजन चिदीको अवस्था गम्भीर रहेको प्रहरीले जनाएको छ ।
शनिबार बेलुका करिब ६ बजे झडेवाबाट रहबासस्थित चुनढुंगा खानीतर्फ जाँदै गरेको लु२ख ४५२५ नम्बरको टिपर दुर्घटना भएको हो । टिपर सडकबाट करिब १०० मिटर तल खसेको प्रहरीले जनाएको छ ।
दुर्घटनामा चालक सुनारसहित चारजना घाइते भएका थिए । घाइतेलाई उपचारका निम्ति लुम्बिनी मेडिकल कलेजमा पठाइएको थियो । उपचारका क्रममा तीन पुरुषलाई चिकित्सकले मृत घोषणा गरेका प्रहरीले जनाएको छ ।
