काठमाडौं । इलेक्ट्रिकल इन्जिनियरिङ स्कुल्स एसोसिएसनको आयोजनामा इलेक्ट्रिक इन्जिनियरिङ शिक्षकहरूका लागि दुई दिने प्रशिक्षण तथा कार्यशाला अभिमूखीकरण कार्यक्रम सम्पन्न भएको छ । काठमाडौंको सीतापाइलास्थित सीतापाइला माध्यमिक विद्यालयमा आयोजित उक्त कार्यशालामा विशेष गरी इलेक्ट्रिकल इन्जिनियरिङको आधुनिक शिक्षण पद्धति र प्रविधिका बारेमा गहन छलफल र प्रशिक्षण दिइएको थियो ।
दुई दिनसम्म चलेको उक्त कार्यक्रममा विज्ञहरूले प्राविधिक शिक्षण विधि, पाठ्यक्रम विकास, प्रयोगात्मक सीप र नवीनता सँगै अन्तरक्रियात्मक रुपमा सहभागी शिक्षकहरूबीच अनुभव आदानप्रदान पनि गरिएको छ ।
२०७९ सालमा स्थापना भएको इलेक्ट्रिकल इन्जिनियरिङ स्कुल्स एसोसिएसनले प्राविधिक शिक्षाको गुणस्तर सुधार र शिक्षकहरूको दक्षता अभिवृद्धिका लागि यस्ता कार्यक्रमहरू आयोजना गर्दै आएको छ ।
शिक्षकहरूलाई भविष्यको प्रविधि र शिक्षण शैलीसँग अभ्यस्त गराउन यो कार्यशाला कोसेढुङ्गा सावित हुने आयोजकले विश्वास व्यक्त गरेको छ । कार्यक्रममा सहभागी शिक्षकहरूले सिकेका सीपलाई कक्षाकोठामा प्रयोग गरी विद्यार्थीहरूलाई दक्ष जनशक्तिको रूपमा उत्पादन गर्न प्रतिबद्ध रहने बताएका छन् । प्रशिक्षण तथा कार्यशालामा विभिन्न विद्यालयका प्राविधिक शिक्षकहरूको सहभागिता रहेको थियो ।
