धादिङको गल्छी गाउँपालिका–६ बैरेनीस्थित पृथ्वी राजमार्गमा गएराति भएको सवारी दुर्घटनामा ३७ जना घाइते भएका छन्। जिल्ला प्रहरी कार्यालय धादिङका अनुसार मंगलबार राति करिब ११ः३० बजे काठमाडौंबाट चितवनतर्फ जाँदै गरेको बसले सडकमा रोकिराखिएको ट्रकलाई पछाडिबाट ठक्कर दिएको थियो। त्यसपछि सोही दिशाबाट आउँदै गरेको अर्को बसले समेत दुर्घटनाग्रस्त बसलाई ठक्कर दिँदा दुर्घटना भएको हो।
दुर्घटनामा बा.प्र.०१–००६ ख ७४९९ नम्बरको बस, बा.प्र.०१–००६ ख ६७१६ नम्बरको बस र बा.प्र.०३–००१–००६ ख २०५६ नम्बरको ट्रक संलग्न रहेका प्रहरीले जनाएको छ।
घाइते यात्रुहरूलाई इलाका प्रहरी कार्यालय गजुरी, प्रहरी चौकी बैरेनी तथा स्थानीयको सहयोगमा उद्धार गरी प्रारम्भिक उपचारका लागि बैरेनी अस्पताल र स्मारिका मेडिकल हलमा लगिएको थियो। त्यसमध्ये ३ जनालाई उपचारपछि डिस्चार्ज गरिएको र बाँकी ३४ जनालाई थप उपचारका लागि काठमाडौं पठाइएको प्रहरीले जनाएको छ।
हाल २८ जना घाइतेको राष्ट्रिय ट्रमा सेन्टर र शिक्षण अस्पताल महाराजगञ्जमा उपचार भइरहेको छ भने अन्य ६ जनालाई थप उपचारका लागि काठमाडौं रिफर गरिएको छ। दुर्घटनामा संलग्न तीनै सवारी चालकलाई प्रहरीले नियन्त्रणमा लिई अनुसन्धान अघि बढाएको जनाएको छ।
