धादिङ । धुनिवेशी नगरपालिकास्थित त्रिकुटेश्वरी माध्यमिक विद्यालयको स्कुल अफ इलेक्ट्रिकल इन्जिनियरिङ अन्तर्गत स्थापना गरिएको विज्ञान तथा इलेक्ट्रिकल प्रयोगशालाको उद्घाटन गरिएको छ । धुनिवेशी नगरपालिका र शेषकान्त फाउण्डेशनको सहयोगमा निर्मित प्रयोगशालाको नगरपालिकाका प्रमुख बालकृष्ण आचार्य र उपप्रमुख सुरज उप्रेतीले संयुक्त रूपमा रिमोटको माध्यमबाट विद्युत् बत्ती प्रज्वलन गरी प्रयोगशालाको उद्घाटन गर्नुभएको हो ।
उक्त प्रयोगशालाको उद्घाटनसँगै विद्यालयमा सञ्चालन भइरहेको “सिक्दै कमाउँदै“ कार्यक्रम अन्तर्गत विद्यार्थीहरूले निर्माण गरेका विद्युतीय बत्तीहरूको बिक्री शुभारम्भ समेत गरिएको छ ।
कार्यक्रममा विद्यार्थीहरूले व्यावहारिक शिक्षालाई आत्मसात् गर्दै आफैंले उत्पादन गरेका विद्युतीय सामग्रीहरू पनि प्रदर्शन गरेका थिए । यस प्रकारका कार्यक्रमले विद्यार्थीहरूमा सीप विकास, उद्यमशीलता प्रवद्र्धन तथा प्राविधिक शिक्षाप्रति आकर्षण बढाउन महत्वपूर्ण योगदान पुग्ने शेषकान्त फाउण्डेशनका जिवनाथ ढकालको भनाई छ ।
विद्यालयले प्राविधिक शिक्षालाई व्यवहारिक र उत्पादनमुखी बनाउन विज्ञान तथा इलेक्ट्रिकल प्रयोगशालाको स्थापना गरेका विद्यालयका प्रधानाध्यापक रमेश कडेँलले बताउनुभयो । यसबाट विद्यार्थीहरूले सैद्धान्तिक ज्ञानसँगै प्रयोगात्मक सीप हासिल गरी भविष्यमा आत्मनिर्भर बन्न सहयोग पुग्ने अपेक्षा गरिएको उहाँको भनाई छ । विद्यालय व्यवस्थापन समितीका अध्यक्ष बुधे मिजारको अध्यक्षतामा भएको उक्त कार्यक्रममा शिक्षक, अभिभावक, विद्यार्थी तथा स्थानीय जनप्रतिनिधिहरूको उपस्थिती रहेको थियो ।
