धादिङको धुनिबेशी नगरपालिकाले कृषि उत्पादन वृद्धि तथा कृषिमा आधुनिक प्रविधिको प्रयोगलाई प्रोत्साहन गर्ने उद्देश्यले ५० प्रतिशत अनुदानमा ९२ जना कृषकलाई मिनीटिलर वितरण गरेको छ।
साझेदारीमा सञ्चालित कृषि यान्त्रिकीकरण कार्यक्रम अन्तर्गत नगरपालिकाको कृषि शाखाको समन्वयमा मिनीटिलर हस्तान्तरण गरिएको हो। कृषि कार्यलाई सहज, छिटो तथा कम लागतमा सञ्चालन गर्न सहयोग पुग्ने अपेक्षासहित कृषकहरूलाई उपकरण प्रदान गरिएको नगरपालिकाले जनाएको छ।
पछिल्लो समय कृषिक्षेत्रमा जनशक्तिको अभाव र उत्पादन लागत बढ्दै गइरहेको अवस्थामा यस्ता कृषि उपकरणले कृषकलाई राहत पुग्ने विश्वास गरिएको छ।
कार्यक्रममा नगर प्रमुख बालकृष्ण आचार्य, नगर उपप्रमुख सुरज उप्रेती,प्रमुख प्रशासकीय अधिकृत विनोद कुमार खनाल लगायतको उपस्तिथि रहेको थियो।
कार्यक्रमलाई सम्बोधन गर्दै नगर प्रमुख आचार्यले कृषिलाई व्यवसायिक, आधुनिक तथा उत्पादनमुखी बनाउन नगरपालिकाले विभिन्न कार्यक्रम सञ्चालन गर्दै आएको बताउनुभयो।
