धादिङ । त्रिभुवन राजपथ र पृथ्वी राजमार्ग अन्तर्गतको नागढुंगा–नौबिसे–मलेखु सडक खण्डमा मनसुनजन्य विपद् तथा पहिरोको जोखिमलाई मध्यनजर गर्दै द्रुत प्रतिकार्य टोली परिचालन गरिएको छ।
सडक विभाग तथा सम्बद्ध आयोजनाका अनुसार वर्षायाममा सडक अवरुद्ध हुन सक्ने सम्भावित क्षेत्रहरू पहिचान गरी एस्काभेटर, ब्याकहो लोडर, टिपर लगायतका हेभी इक्विपमेन्ट तथा आवश्यक जनशक्ति तयारी अवस्थामा राखिएको छ।
सडक खण्डलाई चार भागमा विभाजन गरी पहिरो नियन्त्रण तथा राजमार्ग सुचारु राख्ने संयन्त्र तयार पारिएको आयोजनाले जनाएको छ। झ्याप्ले खोला, चारकिला, सत्किला, कमेरे भिर, चिरौँदी पुल, जारेखेत, चालिसे र परेवा भिरलाई उच्च जोखिमयुक्त क्षेत्रका रूपमा पहिचान गरिएको छ।
विपद्को समयमा यात्रु तथा स्थानीयले सिधै सम्पर्क गर्न सक्ने गरी आयोजनाले आवासीय इन्जिनियरदेखि मेसिन अपरेटरसम्मको सम्पर्क नम्बरसमेत सार्वजनिक गरेको छ।
मौसम प्रतिकूल भएका बेला सावधानीपूर्वक यात्रा गर्न तथा सडक अवरुद्ध भएमा सम्बन्धित निकायलाई तत्काल जानकारी दिन आयोजनाले अनुरोध गरेको छ।
