थाक्रे । धादिङको थाक्रे गाउँपालिका वडा नम्बर ७ स्थित माटीगाउँका कृषकहरुलाई सोलार र थोपा सिँचाई एवम् प्लास्टिक घर वितरण गरिएको छ । सहास नेपालको स्थानिय प्रयासमा जिविकोपार्जन सुधार परियोजना अन्तर्गत माटीगाउँ कृषक समुह मार्फत कृषकहरुका लागि सोलार १९ थान, प्लास्टिक र थोपा सिँचाई ४ थान वितरण गरिएको परियोजना अधिकृत हरि प्रसाद अधिकारीले बताउनुभयो । उहाँले गाउँपालिका अध्यक्ष रामकुमार आचार्य, उपाध्यक्ष अम्बिका रुपाखेती, वडा अध्यक्ष रामकुमार बस्नेत लगायतबाट उक्त सामाग्रीहरुको वितरण गरिएको बताउनुभयो ।
यसका साथै समुहबाट सञ्चालित कार्यक्रमहरुको पनि अनुगमन गरिएको छ । उक्त माटी गाउँमा जलवायु मैत्री गाउँ बनाउन सुधारिएको धुवाँ रहित चुल्हो, भाँडा धुने स्ल्याब, गोबर ग्याँस बनाउने कार्यमा सहयोग साथै सहजिकरण, सामुदायिक बिउ बैंकको लागी समुदायलाई तालिम र सहजिकरण, कागतिका बिरुवा, प्लाष्टिक घरमा खेती र थोपा सिंचाई लगायतका प्रबिधि साथै समूह परिचालनका कार्यमा सहास नेपालले काम गरिरहेको छ ।
यसैगरी सामाग्री वितरण, अनुमगनका साथै समुदाय सँग अन्तरक्रिया कार्यक्रम पनि भएको छ । कार्यक्रममा गाउँपालिका र वडा प्रतिनिधीहिरुले जलवायु मैत्रि नमुना गाउँ बनाउने र होमस्टे संचालन गर्ने गरि योजना बन्नु पर्ने र यसमा सहास नेपालका साथै गाउँपालिकाले पनि सहयोग गर्ने प्रतिबद्धता व्यक्त भएको छ ।
यस्तै सहास नेपालले सामुदायिक बिउ बैँक बनाउने र गाउँपालिकाले समुदायको योजनामा गाउँपालिकाको बिउ प्रर्दशनी दराज किनिदिने कार्यक्रममा बताईएको छ ।
२०७६ पौष १५ गते प्रकाशित
