काठमाडौं । संघीय संसदको छठौँ अधिवेशनमा संविधान संशोधन सम्बन्धी गैरसरकारी विधेयक पेश नहुने भएको छ । सरकारले ल्याएको विधेयक संघीय संसद अन्तर्गतको प्रतिनिधि सभाको बैठकमा टेबल भईसकेकाले यही अधिवेशमा राजनीतिक दलको तर्फबाट दर्ता गरिएको संविधान संशोधन सम्बन्धी अन्य विधेयक प्रक्रियामा नजाने भएको हो । प्रतिनिधि सभा नियमावलीमा एउटै अधिवेशनमा समान विषयको विधेयक एक भन्दा बढी प्रस्तुत हुन नसक्ने व्यवस्था उल्लेख गरिएको छ । सोही व्यवस्थाअनुसार संविधान संशोधन सम्बन्धी अन्य दुई विधेयक यस अधिवेसनमा पेस नहुने भएको हो ।
सरकारले गत जेठ ७ मा लिम्पियाधुरा, लिपुलेक र कालापानी सहितको भू–भाग समावेश गर्दै नेपालको राजनीतिक एवं प्रशासनिक नक्सा जारी गरेको थियो । नयाँ नक्सा जारी भएसँगै संविधानको अनुसूची ३ मा रहेको निसान छाप परिमार्जन गर्न सरकारले ल्याएको संविधानको दोश्रो संशोधन विधेयक संशोधनको प्रक्रियामा रहेको छ ।
