काठमाडौं । सार्क अन्तर्गतको मुलुकहरुमध्ये भारतमा सर्वाधिक संक्रमण र मृत्यु भएको छ। जोन हप्किन्स विश्वविद्यालयले प्रकाशित गरेको सोमबार बिहानसम्मको तथ्यांक अनुसार भारतमा ३ लाख २० हजार ९ सय २२ जनामा संक्रमण पुष्टि भएको छ भने ९ हजार १ सय ९५ जनाको मृत्यु भएको छ।
भारतपछि सर्वाधिक संक्रमण देखिएका सार्क देशको सूचीमा पाकिस्तान, बंगलादेश, अफगानिस्तान, नेपाल, माल्दिभ्स, श्रीलंका र भुटान छन्। सबैभन्दा सुरक्षित भने भुटान देखिएको छ। त्यहाँ ६६ जनामा संक्रमण पुष्टि भएको छ। मृत्यु शून्य रहेको भुटानमा २१ जना संक्रमणमुक्त भएका छन्।
नेपालमा पनि ५ हजार ७ सय ६५ जनामा संक्रमण पुष्टि भएको छ। संक्रमितमध्ये ९ सय ७४ जना संक्रमणमुक्त भएका छन् भने १९ जनाको मृत्यु भएको छ।
