काठमाण्डौं । चीन र भारतबीच हालै मात्र लद्दाखको गलवान उपत्यका क्षेत्रमा भएको झडप र उब्जिएको समस्याका विषयमा नेपालले प्रतिक्रिया दिएको छ। नेपालको परराष्ट्र मन्त्रालयले आज शनिबार विज्ञप्ति जारी गरेर ‘शान्तिपूर्ण रुपमा समाधान निकाल्न’ सुझाव दिएको हो।
नेपाल मुलुकहरूबीचको विवाद शान्तिपूर्ण तरिकाबाट सुल्झाउन पर्छ भन्ने पक्षमा रहेको र नेपाल सधैँ क्षेत्रीय र विश्व शान्तिको पक्षमा उभिदै आएको विज्ञप्तिमा उल्लेख छ।
‘गलवान उपत्यकामा भएको घटनाको सम्बन्धमा आपसी संवादबाट शान्तिपूर्ण ढंगले समाधान निकाल्न छिमेकी मित्रराष्ट्र भारत र चीन सक्षम हुने विश्वास छ,’ विज्ञप्तिमा भनिएको छ, ‘क्षेत्रीय र समग्र विश्वको शान्तिका लागि दुवै देशबीचको देखिएको विवाद समाधान भइ सहज सम्बन्ध हुन जरुरी छ।’ झडपमा भारतका २० सैनिक मारिएको यसअघि नै पुष्टि भइसकेको छ।
