काठमाण्डौं । प्रधानमन्त्री केपी ओलीले शनिबार साँझ बालुवाटारमा बोलाएको राज्यमन्त्रीसहितको बैठक सकिएको छ । प्रधानमन्त्री ओली राष्ट्रपति निवासबाट फर्किएसँगै सवा सात बजेबाट सुरु भएको बैठकमा प्रधानमन्त्री ओलीले पार्टी एकता गम्भीर अवस्थामा पुगेको ब्रिफिङ गरेका छन् ।
‘मेराविरुद्ध षडयन्त्र भएको छ, मेराविरुद्ध र राष्ट्रपतिका विरुद्ध भएका षडयन्त्रहरुलाई मैले बाईफोर्स, बाईस्टेप नियन्त्रण गर्नुपर्ने हुन सक्छ’ प्रधानमन्त्री ओलीले मन्त्रीहरुसँग भने, ‘यस्तोबेलामा तपाईहरु कता भनेर मैले सोध्नुपर्ने हुनसक्छ । तपाईहरुले आफ्नो साइड रोज्नुपर्ने हुनसक्छ ।
पार्टीमा प्रधानमन्त्री ओलीको राजीनामा माग भइरहेका बेला उनले मन्त्री र सल्लाहकारहरुसँग परामर्श गरेका हुन्। उनले शनिबार साँझ गरेको सो बैठकमा पछिल्लो परिस्थितिबारे परामर्श गरेको उनका सल्लाहकारहरुले बताएका छन्।
‘समसामयिक परिस्थीतिका बारेमा मन्त्रिमण्डलका सदस्यहरुलाई जानकारी गराउनका लागी प्रधानमन्त्रीज्यूले अहिले सांझ जारि बैठक बोलाउनु भएको हो,’ प्रधानमन्त्रीका परराष्ट्र मामिला सल्लाहकार राजन भट्टराईले बताएका छन्।
